Përfshirja e agjentëve të Policisë në trafikimin e drogës nga Porti i Durrësit në drejtim të Italisë ka bërë që të merren masa të rrepta sigurie. Krahas kontrolleve të imtësishme që vijnë pas kapjes së një sasie prej 2.5 tonësh kanabis që kaloi nga Durrësit për në Itali me traget, vërehet prania e një numri të lartë të agjentëve të Sektorit të Antidrogës.
Këta të fundit janë instaluar në pikat kyçe, ndërsa të veshur me veshje civile vërejnë me kujdes të gjitha lëvizjet e kamionëve, autobusëve, mjeteve të ndryshme dhe pasagjerët që presin të nisen me tragetet e linjave me Italinë.
Burime për “Panoramën” thanë se të gjithë kamionët që nisen për në Itali (edhe ata që kthehen), autobusët, autoveturat dhe bagazhet e pasagjerëve kontrollohen rreptësisht nga agjentët që operojnë në Pikën Kufitare.
Blindimi i portit më të madh të vendit ka ardhur fill pas arrestimit të disa efektivëve të Policisë të akuzuar si bashkëpunëtorë me trafikantët e drogës. Por, kontrollet e imtësishme kanë lënë të pakënaqur drejtuesit e mjeteve të rënda që futen në skaner.
Drejtuesit e kamionëve thanë për gazetën se kalimi në skaner i kamionit me produkte ushqimore është një veprim krejtësisht i papërgjegjshëm, pasi rrezet depërtojnë në ushqim, i cili më pas konsumohet nga njerëzit.
Gjithashtu, kalimi në skaner i të gjitha mjeteve të transportit krijon vonesa. Madje, sipas tyre, ka pasur raste që nuk kanë mundur të imbarkohen në traget. Në janar të këtij viti, u bllokua në Itali një sasi prej 2.5 tonësh kanabis, e cila ishte trafikuar nëpërmjet Portit të Durrësit, ku të implikuar ishin një numër shumë i madh funksionarësh të agjencive që operojnë në këtë pikë kufitare. Ndërkohë, ka shkuar në 12 numri i të arrestuarve si pjesë e grupit kriminal që organizoi trafikimin e lëndës narkotike./Panorama
