Lëvizja Socialiste për Integrim ka përshëndetur vendimin e qeverisë për miratimin e Byrosë Kombëtare të Hetimit.
Deputeti i LSI Petrit Vasili gjatë një konference të posaçme për mediat përshëndeti vendimin duke shprehur mbështetjen e forcës politike që përfaqëson.
Ai i dha fund zërave që flisnin për kundërshti të LSI në disa dispozita që lidheshin edhe me varësinë e kësaj strukture.
“Është për t’u përshëndetur ky vendim. Ky draft ka patur mbështetjen e ODAT. Mënyra sesi eci ligji, realizoi një proces gjithëpërfshirës dhe konsensual. Në këtë mënyrë merr zgjidhje, edhe një kërkesë e opozitës për miratimi e këtij projektligji. Kjo strukturë duhet të fillojë sa më parë nga puna, pasi objektivat që ligji ka, kanë të bëjnë me çështje të rëndësishme, që në këtë mënyrë do të marrin përgjigje.
Ky proces gjithëpërfshirës, që i dha përgjigje kërkesave të gjithë forcave politike, është për t’u përshëndetur në mënyrë të veçantë. Kjo rrugë konsensualiteti është me rëndësi të na prijë edhe në çështje ët tjera, siç është edhe reforma në drejtësi. Ka pasur interes të përbashkët të opozitës dhe mazhorancës për të ecur përpara me këtë çështje. Problemi kryesor tani mbetet fillimi i funksionimit të strukturës sa më parë. Ne mbështetim plotësisht draftin e miratuar në mbledhjen e qeverisë”, tha Vasili.
