Kreu i Partisë Demokratike, Lulzim Basha paraqiti propozimet e tij për votën e emigrantëve dhe listat e hapura me shqiptarët që jetojnë dhe punojnë në Britaninë e Madhe.
Gjatë këtij prezantimi, Basha u ndal edhe në listat e hapura, ndërsa kërkoi që qytetarët të mund të zgjedhin direkt deputetin e tyre. Sipas tij, sot në Kuvend ka deputetë që arritën të sigurojnë vetëm 300 mbështetës, dhe mbetën jashtë kandidatë që siguruan rreth 9600 vota.
“Ça do me thënë listat e hapura? Shumë e thjesht, ai që merr më shumë vota, ai futet në parlament. Ai që ka mbështetjen apo ajo që ka mbështetjen më të madhe të qytetarëve, do të jetë përfaqësues i qytetarëve. Dhe do të marrin fund paradokset ku sot në Kuvend kemi deputet që kanë mbledhur 300 vota dhe jashtë Kuvendit kemi deputet me 9600 vota që s’u bënë deputetë. Listat e hapura të cilat u premtuan, por nuk u realizuan kurrë, i japin fund këtij paradoksi. Ka deputetë jo vetëm të PS, të cilat e kanë më të kollajtë me listat e mbyllura. E kanë më kollaj me shefin sesa me njerëzit. Pse? Sepse e dinë që kjo e dyta është shumë më e mundimshme”, tha Basha.
Ndërsa bëri të ditur, se të premten e 10 Nëntorit, është depozituar propozimi për votën e diasporës i cili mundëson që emigrantët jo vetëm të votojnë por të ketë të njëjtën peshë të votës si shqiptarët, Basha u shpreh e kërkon që vota e shqiptarëve të jetë e barabartë, pavarësisht se nga hidhet ajo.
“Arsyeja pse ne shohim një ngecje të procesit, që do të çonte në materializimin e votës për shqiptarët që jetojnë jashtë Shqipërisë, është së prej kohësh kjo qeveri ka vënë në punë mekanizma manipulimi të vullnetit popullor, mekanizma të cilat nuk pinë ujë kur bëhet fjalë për të influencuar votën e shqiptarëve jashtë Shqipërisë. Ju e keni parasysh se për çfarë e kam fjalën. E kam fjalën që nga 50 mijë lekëshi ku blihet vota në Shqipëri, e deri tek elementet e tjera të patronazhimit me kërcënimin e bukës së gojës, apo me vendin e punës, mekanizma pra që janë përdorur dhe përdoren gjerësisht, siç citojnë edhe raportet e institucioneve ndërkombëtare që vazhdojnë zgjedhjet shqiptare… Dhe për këtë arsye duan ta ngushtojnë, duan të kenë dy apo tre apo katër deputetë që përfaqësojnë diasporën. Kjo është e padrejtë.
Ne duam që vota e shqiptarëve të jetë e barabartë, s’ka rëndësi nëse hidhet në Vlorë, apo në Kukës, apo në Tiranë, apo në Durrës, apo në Londër, apo në Manchester, apo në Shtetet e Bashkuara të Amerikës, apo në Itali, apo në Greqi, vota duhet të jetë e barabartë. Barazia e votës është një nga parimet themelore mbi të cilën ngrihet demokracia përfaqësuese bashkëkohore. Ndaj dhe një nga propozimet kryesore që janë çuar në parlament ditën e premte, ka të bëjë me barazinë e votës.” – u shpreh kreu i PD, Lulzim Basha./m.j
