Policia e Durrësit shoqëroi një natë më parë 16 persona, mes tyre shtatë balerina. Njëra prej tyre, që rezultoi se ishte e mitur, punonte në një lokal në zonën e Plazhit.
“Shkak për shoqërimin e këtyre vajzave dhe personave të tjerë të shoqëruar janë bërë kontrollet e uniformave blu në lokalet më të frekuentuara të qytetit të Durrësit dhe Shijakut, me qëllim për të kapur personat e shpallur në kërkim, armë dhe drogë”, sqaroi Policia e Durrësit.
Mes tyre, mësohet se është shoqëruar edhe pronari i lokalit ku u kap balerina e mitur, dhe ndërkohë po punohet për sqarimin e plotë të rrethanave. Mësohet se vajzat ishin nga qytete të ndryshme të vendit, mes tyre edhe të komunitetit rom.
Dyshohet se ato shfrytëzoheshin edhe për prostitucion në këto lokale nate, ndaj ka nisur hetimi ndaj tyre dhe pronarëve që i kishin punësuar ato.
