Çështja e lobimit të Partisë Demokratike në SHBA përmes disa burimeve ruse ka zënë një prej çështjeve kryesore edhe në grupin parlamentar të PS.
Kjo forcë politike ka theksuar se nuk do t’i ndahet kësaj çështjeje deri në zbardhjen e plotë.
Kryetari i Grupit të PS Taulant Balla ka ndarë para deputetëve socialistë kronologjinë e lobimit që nis para zgjedhjeve të 25 Qershorit.
Sipas Ballës, i dyshimtë mbetet edhe financimi i protestës 3-mujore në çadër.
“Ka shumë dyshime lidhur me financimin e protestës 3-mujore të PD kundër reformës në drejtësi. Kontrata e PD me ‘Beniata Trade’ është mbajtur e fshehur për disa muaj. Përmes pagesave të majme kompania ka kërkuar dhe realizuar takime me anëtarë të stafit të Trump. Pagesat e PD nuk përfshihen fare në raportin që PD ka depozituar në KQZ për shpenzimet elektorale në zgjedhjet e 25 Qershorit, pavarësisht se është detyrim ligjor”, tha Balla.
Ai ka folur më tej edhe për foton e Lulzim Bashën me presidentin Trump në mes të fushatës.
“Një javë e gjysmë para zgjedhjeve të 25 qershorit, Basha e ndërpreu fushatën dhe shkoi në SHBA ku lobuesi Nik Muzin e futi Bashën në një takim për mbledhje fondesh të kandidatit për guvernator në Mill Ëoki, takim në të cilin merrte pjesë edhe Presidenti Trump, në këtë takim ku përmes një pagese kontribuese prej 20 mijë dollarësh mund të fitohej një vend VIP dhe një foto me presidentin Trump. Dhe Basha arriti ta kishte këtë foto me presidentin Trump përmes kësaj skeme,” tha Balla
/a.m.
