Pastrim parash në parajsa fiskale. Kjo ishte akuza me të cilën u dënua ish shefi i fushatës së Donald Trump për president Paul Manafort, i cili nuk është i panjohur si emër edhe në Shqipëri. Ish udhëheqësi i fushatës së presidentit Donald Trump, Paul Manafort, u gjet fajtor për tetë akuza për krime financiare, që shënon edhe fitoren e parë në një gjykim të ekipit të prokurorit të posaçëm, Robert Mueller, shkruan javanews.al.
Në procesin që zgjati dy javë, prokurorët thanë se Paul Manafort fshehu miliona dollarë në parajsa fiskale për të shmangur tatimet në SHBA, raporton “VOA”. Por Paul Manafort njihet në Tiranë dhe si homologu i Nick Muzin, lobistit në interes të kryetarit të Partisë Demokratike Lulzim Basha. Emri i Bashës lidhet me lobistët amerikanë për një pagesë të bërë nga parajsat fiskale që kap vlerat afro 1 mln usd, për të cilat ende sot nuk ka përgjigje për burimin e financimit, një vepër kjo që lidhet kryesisht me pastrim parash sipas një investigimi të bërë nga mediat amerikane lidhur me kreun e PD Lulzim Basha. Demokratët ishin ende në kulmin e çadrës së protestës, kur Basha pajtoi një nga njerëzit pranë administratës Trump, për ta ndihmuar që të përcillte vizionin dhe qëllimin e Partisë Demokratike pranë liderëve politikë dhe të biznesit në Shtetet e Bashkuara, shkruan javanews.al.
Disa muaj më pas, në nëntor 2017, kur çadra ishte mbyllur, PD ishte futur në zgjedhje duke dalë humbëse ndërsa Basha ishte rikonfirmuar kryetar, Nick Muzin ishte paraqitur dhe njëherë pranë Departamentit Amerikan të Drejtësisë, për të sqaruar se për shërbimet ndaj demokratëve kishte marrë edhe një tjetër pagesë, prej 150 mijë dollarësh, nga firma Biniatta Trade.
Por Lulzim Basha jo vetëm që mohon ta njohë firmën Biniatta Trade, por mohon edhe pagesën që Muzin thotë se ka marrë të saj në emër të demokratëve. “Nuk e njoh fare Biniatën. Nuk i ka dhënë paratë për PD”, është shprehur Basha. Por sot dënimi i Manafort duket se është një provë e skandaleve ku janë përfshirë lobistët e ‘rekrutuar’ nga Basha.
A.Meta/ javanews.al
