Prokurori i përgjithshëm Adriatik Llalla ka reaguar këtë të martë në lidhje me hetimin ndaj ish-ministrit Tahiri, duke thënë se dosja e dërguar nga pala italiane përmban tregues seriozë.
“Në dosjen e ardhur nga Italia janë të përfshirë persona që kanë për detyrë luftën ndaj krimit”, ka thënë Llalla.
Llalla ka theksuar se, “prokuroria do ndjekë hapat e nevojshëm për Tahirin”, ndërsa ka shtuar se organi i akuzës do të ruajë edhe sekretin hetimor.
“Për këtë çështje prokurorët kanë mbështetjen time”, ka shtuar Llalla.
Kryeprokurori i vendit, gjatë fjalës së tij në një seminar me temë “Lufta ndaj narkotikëve” në një panel me zyrtarë të ministrisë franceze ka bërë një deklaratë të fortë në lidhje me trafikun e kanabisit shqiptar drejt Italisë, e mbështetjen që kanë trafikantët nga zyrtarë të lartë.
Llalla tha se kur hetohen zyrtarët e lartë, politika tenton të ndërhyjë tek prokurorët, duke iu referuar kështu indirekt rastit të dosjes “Habilaj” për të cilën kërkohet edhe arrestimi i ish-minstrit të Brendshëm, Saimir Tahiri.
“Në Shqipëri, së fundmi, është miratuar Reforma në Drejtësi. Një prej risive kryesore të saj është krijimi i kushteve për një pavarësi të plotë të prokurorëve gjatë hetimeve të tyre. Pra, ata janë zotër të çështjes. Por, kjo pavarësi e plotë e tyre nuk duhet dhe nuk mund të shërbejë si një mundësi për këdo faktor, të anatemojnë dhe godasin hetimet e prokurorëve. Është shumë e rëndësishme që prokurori, në çdo rast, të zhvillojë hetimet i pandikuar dhe i pa frikësuar, edhe në ato raste kur subjekte të hetimit janë zyrtarë apo ish-zyrtarë të lartë publikë”, ka deklaruar ai.
Në përfundim të takimit të zhvilluar nga ambasada franceze me temë “Lufta kundër trafikimit të lëndëve narkotike” Kreu i akuzës tha se askush nuk mund të ndërhyjë në punë e prokurorit, pasi është vetë prokurori i çështjes që vlerëson ecurinë e hetimit.
Prokuroria do të ndjekë hapat procedurialë, në detyrën e Prokurorit të Përgjithshëm ka detyrimin moral dhe institucional që të mbështesë veprimet e të gjithë prokurorëve.
Prokurorët janë të pavarur dhe tashmë pas ndryshimeve në reformën në drejtësi prokurori është vetë zoti i çështjes, pra në këtë kuptim askush nuk ndërhyn në punën e prokurorit, përfshi edhe mua. Çdo hetim vlerësohet vetë prej prokurorit të çështjes për mënyrën si do organizojnë dhe drejtojnë hetimet.’
