Kryesocialisti Edi Rama po zhvillon këtë të dielë një takim me gratë dhe vajzat në Kamëz, ku pak ditë më parë pati një takim me të rinjtë e kësaj bashkie.
“Është realisht e pabesueshme po të kesh parasysh se nga jemi nisur dhe të shikosh këtë lum vajzash dhe grash që nuk i duket fundi, pikërisht në këtë bashki që ishte fortesa e burrave, e zhytur në llum. Dhe në këtë vijë, ku sot është një bulevard i mbushur me gra dhe vajza, dhe deri dje ishte një kanal ku baballarët mbanin në krah fëmijët për t’i çuar në shkollë. Elisa përmendi që Bashkia Kamëz ka sot 70% gra, por kur këtu ishte kanali, Bashkia Kamëz ishte 90% burra. Dhe nëse do të shohësh pse ka ndryshuar kaq shumë Kamza, mjafton të shikosh si ka ndryshuar bashkia e Kamzës falë një burri që e ka kuptuar qysh në krye të herës. Dhe në fakt unë e mbaj mend shumë mirë, se kur Rakipi e ka prekur forcën e grave këtu në Kamëz, ka qenë fushata e tij e parë, kur ne tentuam t’i japim Kamzës një shans. Por nuk mjaftoi. Dhe në atë kohë, në disa qendra votimi ishte e pamundur të shkoje në komision, sepse aty ligjin e bënin disa burra të dhunshëm. Dhe Rakipi, më kujtohet kur kemi folur, më tha: është e pamundur në disa pika ku ka votim, se ka disa njerëz të dhunshëm që nuk të lënë të votosh. Në fund, në ato pika nuk pati asnjë problem, se Rakipi çoi disa gra në komision”,- tha Rama.
“I vinte turp njerëzve që të thoshin jam nga Bathorja sepse e përdorin për të fyer sepse ishte njësoj si të thoshte ti jeton në kënetë dhe sot kjo është një e shkuar sepse me guxim Kamza zgjodhi rrugën e të ardhmes dhe mendoni sikur ta zgjidhte më parë ku do të ishte sot. Dhe sot është një ditë e bukur për PS kjo që unë shoh tani është një pamje e bukur për PS sepse ne për të ardhur deri këtu kemi bërë rrugë të gjatë me disa nga zonjat që janë këtu, kur hyje në organizatat e partisë së Kamzës nuk gjeje asnjë vajzë vetëm disa burra. Partia Socilasite kur ne e nisëm këtë kishte 12 për qind gra dhe ishte si bashkia e Kamzes filloi që të rritej dhe sot kemi 40 për qind gra është më mirë se 12 por nuk është mjaftë, duhet që të behni 50 për qind”, tha Rama.
Sakaq, ai i kërkoi grave socialiste që të bashkëpunojnë me gratë demokrate për të votuar Partinë Socialiste, ndërsa burrat i quajti sërish çyryk, duke thënë se ata shohin vetëm ngjyrën e fanellës.
“Duhet të punoni, të bashkëpunoni me gratë demokrate, të cilat e kuptojnë shumë mirë kalimin nga politika në realitet. Burrat kur janë tifozë janë çyryk, nuk shohin, shohin vetëm ngjyrën e fanellës. Vota nuk është një biletë për të parë skuadrën, por një zgjedhje për të gjitha punët e mira që të shkojnë përpara”, tha Rama.
