Qeveria ka nisur sot punimet për rrugën e Arbrit e për këtë arsye kryeministri Edi Rama udhëtoi për në Dibër për të mbajtur një miting në qendër të qytetit.
Kreu i qeverisë tha se ndërtimi i rrugës së Arbrit është çështje kombëtare.
“Nuk do jetë më një iluzion rruga e Arbrit, do të jetë një realitet. Sapo e fitova bastin me Oltën, i thashë kur të flas unë do të fillojë shiu se nuk mbaron pa bereqet ky takim. Prej sot Dibra fillon rrugën, pjesën e fundit të një rrugëtimi, për tu bërë një copë kraharori për Shqipërinë. Po pse vallë një copë rrugë ka ngritur kaq tallaze e kaq pikëpyetje, do thoshte dikush? Pse rruga e Arbrit na qenka një çështje kombëtare? Sepse rruga e Arbrit është një çështje drejtësie, e historisë dhe njerëzore, ndaj një populli të tërë të kyçur në izolim prej shumë dekadash”, tha Rama.
Sipas tij “PD nuk i ofroi Dibrës asgjë, përveç çorbës bajate të politikës. I vetmi realitet deri më sot kanë qenë shpërdorimet që lanë pas rrugë të lëna rrugëve dhe një mal borxhesh. Le të bëjmë ca hesape që duhet ti dëgjojnë edhe ata që pyesin pse zgjati kaq shumë nga zotimi te realizimi ky projekt strategjik. Kur morëm mandatin, ne na u desh të pagunim 5 kontrata me vlerë 2.9 miliardë lekë për ta hapur rrugën e Dibrës si skenë për daulle dhe shirita. E njëjta situatë ishte në të gjithë Shqipërinë. E dini sa ishin detyrimet e programit transport rrugor në fund të 2013? 43 miliardë lekë të reja, që ne u detyruam katër vjet ti shlyejmë një për një”.
