Partia Socialiste ka zgjedhur që ta hapë ndryshe fushatën elektorale të 11 majit. Në sheshin ‘Skënderbej’ janë rreth 15 mijë karrige, ku 12 qarqet po prezantohen sipas radhës me këngë e valle tradicionale.
Socialistët spikasin me organizimin me një skenë gjigande rrethore. Në qendër janë 12 yje që simbolizojnë 12 yjet e flamurit të BE, ndërsa në secilin prej tyre qëndron drejtuesi politik i qarqeve me kandidatët për deputetë. Skenografia përçon qartë mesazhin e sloganit të PS ‘Shqipëria 2030 në BE, vetëm me Edin dhe PS’.
Drejtuesi politik i qarkut Dibër, Blendi Klosi tha nga sheshi “Skënderbej” ku u hap fushata elektorale, tha se PS do të triumfojë sërish në zgjedhjet e 11 Majit. Gjatë fjalës së tij, Klosi tha se PS është një parti që ka kaluar shumë sfida, por më e madhja mbetet mirëqenia e qytetarëve shqiptarë.
Prandaj, tha ai, të gjithë qytetarët dibranë dhe të tjerët anembanë Shqipërisë duhet të votojnë për Edi Ramën dhe PS për të siguruar të ardhmen evropiane.
“Të partisë mbi 100 mijë anëtarë, që merr 1 mln vota në veri e jug, në diasporë po ashtu, e cila fiton zgjedhjet sepse ju ka të gjithë ju me vete. Të partisë që drejtohet nga Rama, vizionari, që shndërroi Shqipërinë në një vend të gatshëm për të hyrë në BE. Mirë se keni ardhur në këtë shesh të madh, simbol i transformimit të Shqipërisë Evropiane. Erdhëm këtu me vallet dhe harenë e Dibrës, ashtu siç pritëm Ramën kur inauguroi rrugën e Arbrit.
Ne jemi parti e madhe që kemi kaluar sfida, por sfidën më të madhe e kemi me mirëqenien e qytetarëve. Të sigurt se do të fitojmë përsëri, qarku i Dibrës do të shndërrohet si gjithë Shqipëria, që do të votojë masivisht PS. Ka një lider që atë që premton e bën, na ka premtuar të gjithë ne socialistëve dhe shqiptarëve se do të jemi pjesë e BE brenda këtij mandati. Prandaj të votojmë masivisht Ramën dhe PS.”, tha Klosi.
