Kryeministri Edi Rama hape zyrtarisht fushatën për zgjedhjet lokale të 30 Qershorit. Partia Socialiste ka zgjedhur Tiranën për të hapur fushatën zgjedhore.
Parku Olimpik në kryeqytet është vendi që ka përzgjedhur PS-ja për të çelur fushatën. Të pranishëm në ceremoninë e hapjes së fushatës janë 61 kandidatët e PS-së për bashkitë e vendit. Gjithashtu, shihen të gjithë deputetët e Partisë Socialiste dhe shefat që drejtojnë fushatën e PS-së në 12 qarqet e vendit.
Ndërkohë që, Erion Veliaj është konfirmuar nga Partia Socialiste për të konkurruar për një mandat të dytë në drejtimin e kryeqytetit.
Zgjedhjet e 30 qershorit do të zhvillohen pa pjesëmarrjen e opozitës, pasi këta të fundit dogjën mandatet dhe prej muajsh vijojnë protestat ku kërkojnë një qeveri tranzitore pa kryeministër Edi Ramën, që do t’u mundësonte më pas zgjedhje të lira dhe të ndershme.
Nisur ky bojkot i opozitës, presidenti Meta është shfaqur i gatshëm që nëse do të ketë vullnet politik, të ndryshojë datën e zgjidhjeve, por Edi Rama është shprehur i prerë se shtyrja e datës së zgjedhjeve është në shkelje të kushtetutës, për këtë arsye 30 qershori, sipas tij nuk do të lëvizë. Ndërkohë që nesër në orën 19:00 opozita do të zhvillojë protestën e shtatë kombëtare përpara Kryeministrisë.
