LIVE/ Nis seanca plenare në Kuvend, pritet miratimi i anëtarëve të komisioneve parlamentare
Kuvendi është mbledhur për seancën e radhës plenare, pas asaj të 18 shtatorit, ku qeveria e re u votëbesua brenda vetëm 25 minutave, për shkak të kaosit të krijuar nga opozita. Seanca nisi pak minuta më parë, me rend dite votimin e kryetarëve dhe anëtarëve të komisioneve parlamentare.
Para seancës, Kryetari i Kuvendit Niko Peleshi mblodhi Konferencën e Kryetarëve për miratimin e listës së anëtarëve, të depozituara nga të tre grupet parlamentare të opozitës. Kuvendi njofton se çështja i kaloi për miratim seancës plenare së bashku me propozimet e Grupit Parlamentar të PS, të cilat u bënë me dije në mbledhjen e mëparshme.
Deri më tani janë miratuar vetëm kryetarët dhe nënkryetarët e propozuar nga PS, ndërkohë që komisionet kanë mbetur jo funksionale për shkak të mungesës së përfaqësuesve të opozitës. Pas bllokimit që krijoi, PD njoftoi një ditë më parë se kishte dorëzuar emrat për 4 komisionet parlamentare që i takojnë asaj të drejtojë.
