Rreth dy orë pas nisjes së protestës, kryeministri Edi Rama ka reaguar përmes Twitter.Ai shkruan se zjarri nga militantët e PD-LSI i bën dëm veç Shqipërisë.
“Çfarë trishtimi një lider opozite që me zë të ikur i thotë qeverisë “Aman ik!”, ndërkohë që ata rrotull tij hedhin zjarr mbi godinën e saj!
Uroj që kujt vete ende pas kësaj politike qorre, t’i jetë hapur sonte syri nga zjarri që qeverisë s’ka ç’i bën, po Shqipërisë i bën veç dëm!” – shkruan Edi Rama mbrëmjen e së shtunës.
Ndërkohë që përplasjet kanë rinisuar përpara Parlamentit. Protestuesit kanë hedhur bomba molotov, fishekzjarre dhe gurë ndaj forcave të rendit. Kjo e ka detyruar policinë që të përgjigjet duke hedhur gaz lotsjellës.
Mes turmës ka persona të maskuar, ndërsa policia ka rrethuar me gjemba parlamentin.
Ndërkohë policia ka parandaluar përhapjen e flakëve duke e lagur me ujë zonën përpara se të mbërrinin protestuesit.
***
Kryedemokrati Lulzim Basha është rikthyer përpara Kryeministrisë, ku militantët kanë vijuar ndriçimin përmes celularëve.
Ndërkohë në fasadën kryesore të kryeministrisë, janë shfaqur përmes një video projektori thirrje për largimin e qeverisë Rama.
***
Ka zgjatur vetëm një orë protesta e PD dhe LSI para Kryeministrisë, ndërsa militantët janë zhvendosur.
Duke përshkuar rrugën “Ismail Qemali” nuk kanë munguar as konfrontimet nga pas godinës së Këshillit të Ministrave.
Ata i kanë vënë flakën disa pemëve në lulishten e pasme si dhe godinës së ish-INIMAs.
***
Pas sulmit me bomba molotv ndaj policisë dhe godinave të Kryeministrisë e Kuvendit, ka reaguar edhe ministri Sandër Lleshaj.
Përmes Twitter, ministri i Punëve të Brendshme fton qytetarët të distancohen nga këto akte.
“Me Molotov nuk ndërtohet demokracia, por synohet të shkatërrohet Shqipëria. Por kjo gjë është e pamundur! Ftoj qytetarët e përgjegjshëm të distancohen nga sulmi ndaj institucioneve. Askush nuk mund ta djegë Shqipërinë përsëri!” – shkruan Lleshaj.
***
Në orën 19:15 janë shënuar aktet e para të dhunës para Kryeministrisë.
Militantë të opozitës kanë sulmuar me bomba molotov kordonin e Policisë dhe godinën e Këshillit të Ministrave dhe Kryesisë së Kuvendit.
Raportohet për disa policë të plagosur ndërsa kordoni i sigurisë është çarë.
Protestuesit kaluan kordonin e policisë dhe i’u afruan derës së kryeministrisë, ndërkohë që njëri prej tyre rrezikoi jetën, pasi afër tij u hodh një bombë molotov, e rrobat e tij morën flakë.
Policia reagoi e hodhi gaz lotsjellës, e turma u shpërnda. Situata e tensionuar vazhdon.
***
Ndërsa ka nisur protesta e opozitës, ndërtesa e Kryeministrisë duket se është blinduar nga forca të shumta policie.
Vetë militantët e PD kanë hedhur kapsolla dhe tymuese që në oborrin e selisë blu, nga ku nisën edhe marshimin.
Me thirrje “Rama Ik”, “E duam Shqipërinë si gjithë Evropa” apo “Shqiptarët e bashkuar kanë për të fituar”, protestuesit e opozitës po zhvillojnë sot protestën e 4 kombëtare.
Shumë prej protestuesve janë të pajisur me kundra gaz.
Drejt kryeministrisë janë hedhur edhe flakadanë e bojë.
Siç shihet edhe në foto, qindra policë janë bërë gardh pas kangjella të hekurit të vendosura që prej mbrëmjes së shkuar.
Rreth 1500 efektivë të policisë janë angazhuar për ruajtjen e sigurisë./i.h
