Kryeministri Edi Rama e cilëson të papranueshëm faktin që kryetarja e Komisionit të Ligjeve Klotilda Bushka po hetohet, pa e thirrur asnjëherë në Prokurori. Teksa ritheksoi mbështetjen ndaj SPAK dhe veçanërisht ndaj drejtuesit të saj Altin Dumani, tha se tanimë Partia Socialiste nuk do heshtë para “shkeljes së standardeve”.
“Diktaturë Shqipëria ka pasur në të shkuarën, kjo është Republikë parlamentare, ku legjislativi dhe ekzekutivi janë të pavarur nga pushteti i drejtësisë. Janë 3 pushtete që operojnë në kornizën e tyre kushtetuese. Duhet të marrim një përgjegjësi sepse sot në debatin publik ka vetëm dy palë, njëra që duartroket dhe brohoret sa herë që shfaqet “gijotina”, sipas asaj pale të gjithë janë për burg, për litar, për t’u vrarë dhe tjetra është pala që sulmon në mënyrë banditeske organet e reja të drejtësisë dhe që shënjestron me libër shpie prokurorët dhe gjykatësit që bëjnë punën e tyre, duke filluar nga drejtuesi i SPAK, i cili ka gjithë mbështetjen tonë sa i përket baltës që ka marrë dhe merr familjarisht. Mungon një palë konstruktive që duhet të jetë edhe garante e pavarësisë së gjyqësorit dhe e lirive dhe standardeve demokratike sepse siç thashë përndryshe biem në kurthin e të kaluarës.”
“Për mua është e pakonceptueshme që kryetarja e Komisionit të Ligjeve, pa diskutuar fare se a ka, apo s’ka të drejtë akuza që e përfshin në atë roman thuajse 400 faqe, e merr vesh nga televizori dhe duke dëgjuar gazetarët specialë. Se ne kemi edhe gazetarë specialë, që disponojnë sekrete hetimore, ushqim që u vjen nga stacioni i trenit për t’u hedhur në pazarin e madh të gjësë së gjallë. Kjo është e papranueshme! As dje, as sot, as nesër, kjo forcë politike nuk do marrë përsipër të japë pafajësi, por ama kjo forcë politike nuk do të heshtë përballë shkeljeve flagrante të standardeve dhe brutalitetit të kujtdoqoftë që ushtrimin e forcës së konsoliduar tashmë të pavarësisë. Se vetëm një idiot apo maskara mund të thotë tani se ne kontrollojmë drejtësinë. Kemi marrë zyrtarisht certifikatën që duart tona janë larg drejtësisë, ama ne nuk jemi këtu hu gardhi dhe të most hemi asgjë kur biem në gjurmë me ose pa dashje të episodeve si ky. Minimalisht kryetarja e Komisionit duhej thirrur dhe duhej pyetur. Ku jemi këtu?!”, tha ai në dëgjesën e grupit parlamentar të PS.
Sipas Prokurisë së Posaçme, Bushka ka kryer veprime aktive të kundërligjshme të cilat kanë interferuar me hetimin e organit procedues në lidhje me procedimin penal ku po hetohet kryebashkiaku Veliaj.
