Gati të gjithë akset që lidhin vendin drejt jugut dhe veriut, tashmë sipas një strategjie të qeverisë, do të jepen me koncesion.
Strategjia e taksimit të rrugëve është rekomanduar nga BERZH dhe sipas saj tarifa që do të paguajnë në të ardhmen varjon nga 0.5 euro, në 3.5 euro për kilometër(shiko tabelën). Në strategji rekomandohet që aplikimi i taksimit për koncesionin e rrugëve, të zhvillohet në 3 faza. Për zbatim të menjëhershëm, rekomandohet vendosja e taksës në rrugët Tiranë-Durrës, Tiranë-Elbasan dhe rruga e Arbrit, e cila ende nuk ka përfunduar.
Vetëm pak ditë më parë një nga akset më kryesore të vendit, Rruga e Kombit u dha me koncesion. Sipas kësaj marrëveshje, drejtuesit e automjeteve që do të qarkullojnë aty, do të jenë të detyruar të paguajnë 5 euro. Ky vendim i qeverisë ka ngjallur mjaft reagime, veçanërisht nga bizneset në zonën e Kukësit, shkruan Panorama.
Kundërshtarët e këtij koncesioni si argument të rëndësishëm sjellin faktin që Rruga e Kombit është ndërtuar me fonde publike dhe jo private. Kurse për sa i përket mirëmbajtjes së saj automjetet, deklarohet se kanë paguar gjithmonë një taksë.
