Këshilli i Ministrave ka miratuar së fundmi një listë të re me emrat e pronarëve që do të kompensohen në rrugë financiare për shkak të kalimit të pronësisë tek poseduesit e ndërtimeve pa leje që legalizohen, të cilët kanë ndërtuar në pronat e tyre.
Vendimi përcakton se, në bazë të ligjit “Për legalizimin, urbanizimin dhe integrimin e ndërtimeve pa leje” dhe ligjit “Për trajtimin e pronës dhe përfundimin e procesit të kompensimit të pronave”, me propozimin e ministrit të Zhvillimit Urban, Këshilli i Ministrave vendos shpërblimin e pronarëve të pasurive të paluajtshme, pronë private, për sipërfaqet takuese të zëna nga ndërtimet informale në qarqet e Elbasanit, Fierit, Shkodrës, Tiranës dhe Lezhës.
Sipërfaqja që shpronësohet është 20.392,1 m² dhe vlera e përgjithshme e kompensimit është 244.223.971,3 lekë, afro 1.7 milionë euro.
Lista e pronarëve që përfitojnë nga kjo shumë jepet më poshtë.
Në përputhje me këtë VKM, ngarkohen zyrat vendore të regjistrimit të pasurive të paluajtshme të Elbasanit, Fierit, Shkodrës, Tiranës dhe Lezhës, të kryejnë ndryshimet përkatëse, për këto pasuri, në regjistrat e pasurive të paluajtshme.
Ngarkohen Ministria e Zhvillimit Urban, Ministria e Drejtësisë, Ministria e Financave, Agjencia e Trajtimit të Pronës, Zyra Qendrore e Regjistrimit të Pasurive të Paluajtshme dhe Agjencia e Legalizimit, Urbanizimit dhe Integrimit të Zonave/Ndërtimeve Informale për zbatimin e këtij vendimi.
Vendimi ka hyrë në fuqi nga dita e djeshme, duke qenë se ai bëhej i detyrueshëm nga momenti që botohej në Fletoren Zyrtare, që ndodhi të enjten.
MA.ME
