Apeli i Krimeve të Rënda liroi dje nga qelitë e burgut Lutfi Shabanin, personazhin e njohur edhe si “Ben Çami”. Ai u lirua për shkak të përmbushjes së afateve të dënimit me 2 vjet burg të dhënë ndaj tij nga Shkalla e Parë për Krimet e Rënda në maj të këtij viti. I dënuari Shabani qëndroi në qeli nga 25 shkurti 2016, datë kur u arrestua si një nga personat e dyshuar për tentativën e trafikimit të një sasie prej 574 kilogramësh kanabis drejt Turqisë.
Kjo akuzë nuk u provua gjatë hetimit. Shabani u dërgua për gjykim vetëm për akuzën e “moskallëzimit të krimit”, për të cilën u deklarua i fajshëm. Vendimi i djeshëm i Apelit është ekzekutuar rreth orëve të pasdites, kur Shabani është larguar nga qelitë e burgut të Durrësit, për të shijuar lirinë.
LIRIMI
Vendimi që nxori nga qelia të akuzuarin Shabani u shpall nga një pesëshe e Apelit e kryesuar nga gjyqtarja Saida Dollani. Trupi gjykues pranoi kërkesën e përfaqësuesit ligjor të Shabanit, avokatit Detar Hysi, për shuarje të masës së sigurisë “arrest në burg” të klientit të tij.
Burime pranë gjykatës pohuan se avokati Hysi ka kërkuar lirimin e Shabanit, duke i bërë me dije gjykatës kishte përfunduar afati kohor i masës së dënimit me burg për të. Kërkesa e avokatit është pranuar edhe nga përfaqësuesi i akuzës në sallën e gjyqit, prokurori Artan Bajramaj.
Pas tërheqjes në dhomën e këshillimit Kolegji Penal i Apelit e ka vlerësuar si të drejtë kërkesën, duke vendosur shuarjen e masës së sigurisë “arrest në burg” ndaj Shabanit. Në të njëjtin vendim Apeli ka urdhëruar lirimin e menjëhershëm të kërkuesit Lufti Shabani nga ambientet e Institucionit të Ekzekutimit të Vendimeve Penale Durrës, nëse ai nuk mbahet i izoluar për llogari të ndonjë mase tjetër sigurimi “arrest në burg”.
DENIMI
Për shkak të precedentëve të tij të mëparshëm dhe dy dënimeve të marra për vepra penale në lidhje me trafikun e narkotikëve, arrestimi i Lutfi Shabanit u përcoll me bujë në shkurt të vitit të kaluar. Fillimisht ndaj tij u caktua masa “arrest në burg” si një nga tre personat të dyshuar për tentativën e trafikimit të 574 kilogramëve kanabis jashtë vendit.
E njëjta masë sigurie u caktua edhe për dy të arrestuarit e tjerë për të njëjtën ngarkesës, Eldi Zahiri dhe Janaq Kaceli. Sasia e drogës u gjet dhe u bllokua nga policia e pikëkalimit kufitar të Kapshticës, e fshehur në rimorkion e një kamion që tentoi të kalonte mbrëmjen e 25 shkurtit. Gjatë hetimit Prokuroria për Krimet e Rënda vlerësoi se nuk kishte prova për përfshirjen e Shabanit në linjën e trafikut të drogës dhe ai u konsiderua përgjegjës vetëm për akuzën e “moskallëzimit të krimit”.
Sipas Prokurorisë për Krimet e Rënda, Shabani ka pasur dijeni se një person me emrin Lenci, i paidentifikuar, kishte sasi drogë. Këtë fakt pretendohet se ai ia ka rrëfyer dy të pandehurve të tjerë. Organi i akuzës pretendoi se i pandehuri Shabani ka pasur dijeni për veprimtarinë e jashtëligjshme dhe nuk e ka kallëzuar atë në organet kompetente.
Më 31 maj 2017 Gjykata për Krimet e Rënda përfundoi gjykimin e kësaj dosjeje, i cili u zhvillua me procedurën e gjykimit të shkurtuar. Përfundimisht gjykata vendosi deklarimin e fajshëm të Shabanit për akuzën e “moskallëzimit të krimit” dhe dënimin e tij përfundimtar me 2 vjet burg.
Që në momentin e arrestimit dhe më pas gjatë seancave të caktimit të masës së sigurisë ndaj tij në Shkallën e Parë dhe në Apel, Shabani ka mbajtur qëndrim mohues në lidhje me akuzën dhe ka pretenduar se nuk ka asnjë lidhje me sasinë e hashashit të bllokuar në Kapshticë. Ai ka mbajtur qëndrim mohues edhe në lidhje me akuzën e “moskallëzimit të krimit”.
Në seancën e konkluzioneve përfundimtare ai kërkoi deklarimin e pafajshëm në lidhje me këtë akuzë. Burime pranë gjykatës konfirmuan se Shabani e ka ankimuar në Apel vendimin e Shkallës së Parë, ku kërkon prishjen e këtij dënimi dhe shpalljen e tij të pafajshëm në lidhje me akuzën e ngritur ndaj tij.
ma.me
