Përpara se të fillonte thatësira, Liqeni Koroneia në Greqinë veriore ishte një ligatinë e mbrojtur, një strehë për mijëra zogj shtegtarë dhe ujorë, përfshirë flamingot, dhe një atraksion për turistët, si dhe për peshkatarët dhe fermerët vendas.
Pas një dekade me reshje të pakta dhe ujitje të tepërt, Koroneia, dikur liqeni i pestë më i madh në Greqi, është zvogëluar në më pak se një të dhjetën e madhësisë së tij origjinale, sipas të dhënave nga Observatori Kombëtar i Athinës. Uji që mbetet mblidhet në një seri pellgjesh të errëta dhe shtrati i ekspozuar i liqenit është një fushë e gjerë balte e çarë dhe e zbardhur nga vitet e diellit përvëlues.
Zona është bërë një simbol i mënyrës se si ndryshimet klimatike dhe thatësira po ndikojnë në Greqinë veriore, ku reshjet e shiut janë bërë më të paqëndrueshme dhe ku fermerët janë gjithnjë e më të dëshpëruar për të pompuar ujin e liqenit në të korrat e tyre.
Problemi preku pjesën më të madhe të Evropës këtë verë, kur valët e të nxehtit dhe reshjet e pakta tkurrën lumenjtë dhe liqenet në nivele të papara në dekada, duke ndikuar në shpërndarjen e mallrave dhe duke kufizuar prodhimin e energjisë.
Shkencëtarët thonë se burimet ujore të liqenit filluan të pakësoheshin pas një sezoni me shira gjatë viteve 2015-2016. Vite me reshje të pakta shiu dhe nxehtësi mbi mesataren që atëherë kanë avulluar jo vetëm ujin e liqenit, por edhe burimet që e furnizonin atë.
Imazhet satelitore të publikuara nga Observatori Kombëtar i Athinës tregojnë se sipërfaqja e saj është zvogëluar në 2.7 kilometra katrorë nga 34.4 kilometra katrorë në vitin 2016.
Për më tepër, ndërsa temperaturat mesatare lokale janë rritur vitet e fundit, avullimi është rritur me 100 deri në 150 milimetra në vit.
Autoritetet thonë se kanë ndërmarrë veprime që kur një gjykatë e Bashkimit Evropian vendosi në vitin 2013 se Greqia nuk kishte arritur ta mbronte Koroneian nga ujitja e tepërt, shpimet e paligjshme të ujit dhe ndotja.
