Kryetari i Kuvendit, Ilir Meta, i cili ndodhet në një vizitë zyrtare në Kinë, në një intervistë për radion “CRI Shqip”, ka folur për marrëdhënien brenda koalicionit si dhe për ligjin e importit të mbetjeve.
Në lidhje me zhvillimet e brendshme politike në Shqipëri dhe vazhdimin e koalicionit me Partinë Socialiste, Meta tha se për të është e rëndësishme që koalicioni të përmbushë pritshmërinë e qytetarëve deri në fund të mandatit.
“Për sa u përket koalicioneve ato do të vendosen nga forumet respektive të forcave politike. Për ne është e rëndësishme të shtojmë kontributin për stabilitetin e vendit, për reformimin e tij dhe dihet të kontributi i LSI-së do të jetë vazhdimisht në rritje,” u shpreh ai.
Ndërsa në lidhje me ligjin e shumë debatuar të importimit të mbetjeve, Meta nuk dha garanci për rivotimin e tij në Parlament, ndërsa nënvizoi se LSI-a do të lexojë me vëmendje argumentet e Presidentit të Republikës.
Meta ka deklaruar se Kina ka një vend të veçantë në historinë e Shqipërisë dhe natyrisht do të ketë një vend të veçantë në të ardhmen.
Kreu i LSI-së ndodhet në Pekin për një vizitë zyrtare në krye të një delegacioni të gjerë parlamentar. Gjatë qëndrimit në Pekin, Meta takoi të martën kryetarin e Konferencës Konsultative Politike, Yu Zhengsheng.
A do të vazhdohet koalicioni me LSI?
Për mua është e rëndësishme që ky koalicion të përmbushë me përgjegjshmëri pritmëritë e qytetarëve shqiptarë deri në fund të këtij mandati dhe jemi aktualisht në momente të rëndësishme të ecurisë së reformës në drejtësi, të realizimit të reformës zgjedhore, të vendimeve që BE duhet të marri për Shqipërinë.
Përsa i takon çështjes së koalicioneve në të ardhmen ato do të vendosen nga forumet e forcave politike. Për ne është e rëndësishme të shtojmë kontributin për stabilitetin e vendit, për reformimin e tij dhe në këtë drejtim dihet që kontributi i LSI është në rritje.
Ka disa zëra nga baza për ta shtuar rolin e LSI në qeverisje, si i shikoni këto zëra?
Mendoj që në LSI ka potencial për të kontribuar akoma më mirë për mirëqeverisjen e vendit.
Ligji i mbetjeve, si e shikon LSI tani pas kthimit nga Presidenti?
Do të na duhet të lexojmë argumentet e Presidentit dhe njëkohësisht duhet të kemi në konsideratë që ky ligj ka shkaktuar një ndjeshmëri të gjerë për shkak të çështjes e cila ka sensibbilizuar opinionin p ublik dhe shoqërinë civile duhet të na ndihmojë për të forcuar dialogun me shoqërinë civile në interes të publikut të gjerë.
