Ministria e Zhvillimit të Ekonomisë, Turizmit, Tregtisë dhe Sipërmarrjes ka gati tashmë aktet nëligjore të ligjit të ri për turizmin, ndërsa pritet t’i dërgojë për shqyrtim në qeveri. Burime nga kjo ministri bëjnë të ditur se me miratimin e tyre do të mund të fillojë puna për zbatimin e këtij ligji i cili pritet të sjellë edhe efekte të ndjeshme në disiplinimin e sektorit, kryesisht për klasifikimin dhe standardizimin e njësive akomoduese, duke qenë se rreth 70% e tij operon në informalitet.
Nga ministria mësohet se ligji do të fillojë të japë efektet e para që në këtë sezon, por të plota do të mund të ndihen pas dy vitesh. Pas daljeve të akteve nënligjore do të nisë puna për trajnimin dhe certifikimin e guidave turistike, që është një pjesë e rëndësishme e këtij dokumenti. Gjithashtu do të nisë edhe puna për klasifikimin e njësive akomoduese.
Këtyre subjekteve do t’iu lihet një afat tranzitor që do të shërbejë si njohës për procedurat e reja që do të nevojiten. Klasifikimi do të bëhet nga një komision i ngritur pranë ministrisë. Në fund të muajit mars do të nisë edhe përgatitja e vlerësuesve, të cilët do të jenë pjesë e procesit të vlerësimit, pasi do të prodhojnë raporte bazuar edhe në vizitat që do të realizojnë në terren. Ndërsa monitorimi do të bëhet përmes Inspektoratit, do të kontrollohet puna e bërë.
Gjatë periudhës mars-prill do të realizohet një fushatë ndërgjegjësimi në të gjithë vendin për nisjen e aplikimeve në të gjithë vendin. Prioritet do t’i jepet pjesës së bregdetit, për shkak të fillimit të sezonit.
