Liderët e Bashkimit Europian nuk arritën në një dakordësi lidhur me vendosjen e një çmimi tavan për gazin gjatë samitit informal që zhvilluan ditën e sotme në Pragë të Çekisë, por udhëheqësit e BE-së janë pajtuar që të rrisin ndihmën financiare dhe ushtarake për Ukrainën. Lajmin e bëri të ditur Presidentja e Komisionit Europian Ursula von der Leyen.
“Nuk është planifikuar, asnjë lajm. Duhet bërë një hap i rëndësishëm”, tha Presidentja e Komisionit Europian.
Shumica e 27 shteteve të BE-së duan vendosjen e një çmimi tavan për gazin, për shkak të rritjes së çmimeve pas ndaljes së furnizimeve me gaz nga Rusia. Për këtë temë, shtetet e BE-së kanë biseduar për javë të tëra, por ka mospajtime lidhur me detajet se si duhet të bëhet kjo.
Çmimet e gazit dhe elektricitetit janë rritur shumë për shkak se Rusia ka ndërprerë furnizimet në përgjigje të sanksioneve të ashpra që BE-ja ka vendosur ndaj Moskës për shkak të luftës kundër Ukrainës.
Presidentja e Komisionit Evropian, Ursula von der Leyen, ka propozuar një “udhërrëfyes” të masave për të ndihmuar në lehtësimin e krizës, përfshirë edhe vendosjen e mundshme të një çmimi tavan.
“Ekziston një mbështetje e gjerë që pranverën e ardhshme, në fund të dimrit kur do të shterohen depot tona, është me rëndësi të madhe që ne të kemi një prokurim të përbashkët të gazit ”, tha Von der Leyen.
Në mesin e ideve të përmendura janë edhe vendosja e çmimit tavan për importet e gazit rus, uljen e çmimit të importeve të tjera të gazit, kufizimin e çmimit të gazit që përdoret për gjenerimin e rrymës dhe vendosjen e një çmimi tavan për transaksionet e gazit midis shteteve të bllokut.
“Të gjithë pajtohen se ne duhet të ulim çmimin e energjisë, por nuk kemi marrëveshje se çfarë instrumente duhet të përdoren për këtë”, tha kryeministri i Polonisë, Mateusz Moraëiecki.
Edhe presidenti i Këshillit Evropian Charles Michel tha se blloku do t’i duhet “të organizojë prokurimin publik të furnizimeve me energji” përpara sezonit veror të mbushjes së magazinave.
Lidhur me kërcënimet për sulme bërthamore ruse, në fund të takimit, Presidenti i Komisionit Evropian Charles Michele tha se BE-ja i merr seriozisht kërcënimet e (Rusisë) për sulmet me armë bërthamore, por që nuk duhet të friksohmei
“Ne i marrim seriozisht të gjitha kërcënimet e përshkallëzimit, por nuk duam të frikësohemi, duam të mbrojmë interesat e atyre që besojnë në të drejtën ndërkombëtare. Kemi dëgjuar kërcënime të drejtpërdrejta ose të tërthorta për përdorimin e armëve bërthamore. Por dje dhe sot kemi verifikuar një vendosmëri të madhe për strategjinë me dy shtylla, të mbështesim Ukrainën dhe vendosmërinë në frenimin e Rusisë, për shembull, përmes sanksioneve”, tha Michele.
/e.d
