Një grua në Lezhë ka rënë pre e dhunës së dy kunetërve të saj, të cilët krahas saj i kanë rrahur edhe vëllanë.
Gjatë ditës së djeshme u bë arrestimi në flagrancë i Sokol Ndocit, 36 vjeç, banues në Mërqi të Lezhës. Gjithashtu u shpall në kërkim dhe punohet për kapjen e vëllait të tij P. Ndoci, 25 vjeç, banues në Lezhë.
Ata akuzohen se kanë ushtruar dhunë fizike ndaj kunatës së tyre, nuses së vëllait tjetër, K.Ndoci dhe ndaj vëllait të saj i cili ndërhyri për të shuar konfliktin.
Ndërkohë për të dëmtuarën u plotësua kërkesë-padia për lëshimin e urdhrit të mbrojtjes së menjëhershme, sepse vjehrri i saj P.N., ka ushtruar dhunë psikologjike ndaj saj.
Noa.al mëson se dy vëllezërit dhe babai i tyre, e akuzonin nusen e vëllait që ishte në emigrim se nuk punonte dhe se e kishte mendjen vetëm për të dalë.
Jo vetëm kaq por ata ditën e djeshme ngritën dorë ndaj saj dhe vëllait të saj, i cili ndërhyri për të shuar sherrin.
E dëmtuara bëri denoncim në polici, duke thënë se kunetërit dhe vjehrri me natyrë fanatike konfliktoheshin me të për motive nga më të dobëtat.
Lidhur me këtë rast materialet i kaluan Prokurorisë së Lezhës për veprat penale “Dhunë në familje”, “Plagosje e lehtë me dashje” dhe “Dhunë në familje”./a.k
