Presidenti i SHBA-ve Barack Obama, përmes një letre zyrtare dërguar Nishanit, ka uruar Shqipërinë për 103 vjetorin e Ditës së Pavarësisë së vendit. Obama shkruan se 28 nëntori shënon dhe një moment për të reflektuar mbi partneritetin e qëndrueshëm mes Shqipërisë dhe SHBA-ve.
Obama thekson se SHBA vijon të jetë e përkushtuar për të ndihmuar Shqipërinë në përparimin e saj drejt familjes Europiane. Në letër theksohet po ashtu përkrahja dhe kontributi i Shqipërisë në koalicionin kundër ISIS.
Më poshtë letra e plotë e Presidentit Obama:
“I dashur Zoti President,
Ju shpreh urimet më të mira për ju dhe popullin shqiptar edhe në emër të popullit amerikan me rastin e 28 Nëntorit, Ditës suaj të Pavarësisë.
Ky shënon edhe një rast për të reflektuar mbi partneritetin e fortë dhe të qëndrueshëm që gëzojnë Shtetet e Bashkuara të Amerikës dhe Shqipëria, ashtu siç u nënvizua edhe nga nënshkrimi në prill i Partneritetit Strategjik Sh. B. A. – Shqipëri. Shtetet e Bashkuara të Amerikës mbeten të përkushtuara për të ndihmuar Shqipërinë që të përparojë në rrugëtimin e saj drejt integrimin të plotë Euro-Atlantik.
U jam mirënjohës kontributeve të Shqipërisë në drejtim të rritjes së paqes dhe qëndrueshmërisë në Ballkan si dhe anembanë botës. Ato përfshijnë edhe ndihmesën e vlefshme të Shqipërisë si pjesëtare e Koalicionit Ndërkombëtar që lufton ISIS-in dhe kundër ekstremizmit të dhunshëm në rajonin e Ballkanit. Unë pres që në këtë drejtim dhe në shumë fusha të tjera të rëndësishme, ta thellojmë bashkëpunimin tonë gjatë viteve në vazhdim.
Edhe njëherë, ju shpreh urimet e mia ndërsa ju kremtoni këtë ditë të gëzuar!
Sinqerisht,
Barack Obama”
