Kryetari i grupit të Partisë Socialiste Taulant Balla, në deklaratën për mediat bërë nga kryesia e Kuvendit, ka publikuar ndër të tjera letrën e dorëheqjes, që nënkomisar Emiljano Nuhu, u kishte drejtuar Drejtorit të Përgjithshëm të Policisë Ardi Veliu, dhe për dijeni presidentit Meta, kryeministrit Rama dhe kryeprokurores Marku.
Në letrën e cila mban datën 14 shtator 2018, dhe që mban firmën e nënkomisar Emiljano Nuhu, ky i fundit kërkon lirimin nga detyra, pas kërcinimeve sipas tij, nga deputeti Rrahman Rraja, djali i të cilit akuzohej për përdhunim.
Ai thotë se deputeti kishte pajtuar Durim Bamin për eliminimin e tij.
‘Më datë 12.09.2018, kam marrë informacion nga rrjeti im sekret që deputeti Z.Rrahman Rraja, ka kontaktuar me shtetasin Durim Bami dhe i ka kërkuar që të më ekzekutojë, pasi unë po i hapja shumë probleme dhe po e dëmtoja politikisht deputetin. Ai është shprehur që me kaq probleme që më ka hapur oficeri Emiljani Nuhu, unë nuk shkoj dot në Parlament. Shtetasi Durim Bami e ka marrë përsipër ekzekutimin tim. I gjetur në kushte të tilla, i lënë në dorën e fatit nga shteti u largova menjëherë dhe për sigurinë time dhe të familjes kërkoj të lirohem nga Policia e Shtetit” shkruan Nuhu në letrën drejtuar e tij të dorëheqjës.
