Një ditë pasi Kryetari i Parlamentit Ilir Meta i adresoi një letër kryetarëve të grupeve për nisjen e procesit të reformës zgjedhore, ka ardhur edhe reagimi nga selia blu.
Kryetari i grupit të depputetëve demokrat Edi Paloka, deklaroi se PD po e shqyrton kërkesën e Metës, por theksoi se nevojitet pasqyrimi i vërejtjeve të OSBEsë.
“Letrën e Metës e mora sot, do ta shqyrtojmë. Kemi kërkuar që vërejtjet e OSBE të pasqyrohen në kod. Edhe një qeveri teknike duhet të ketë kod të ri zgjedhor.” deklaroi Paloka.
Në letrën dërguar krerëve të grupeve, zoti Meta shkruan: “Shqipëria, si një vend kandidat për anëtarësimin në Bashkimin Europian, duhet të përqasë legjislacionin e saj zgjedhor me standardet ndërkombëtare më të mira në këtë fushë, në mënyrë gjithëpërfshirëse dhe transparente me të gjithë aktorët politik dhe institucionet shtetërore të përfshira apo me detyra të caktuara, në procesin zgjedhor. Bazuar në rekomandimet e raporteve përfundimtare të OSBE/ODIHR për zgjedhjet parlamentare të 2013 dhe zgjedhjet vendore të vitit 2015, si dhe të praktikës më të mirë parlamentare, në përgatitjen e ndryshimeve në legjislacionin zgjedhor, do të kërkoja nga ju shprehjen e vullnetit për fillimin e këtij procesi në Kuvendin e Shqipërisë”.
