Për vendet kandidate, radhitja në politikën e jashtme të BE-së ka rëndësi kyçe, sipas ministrit të Jashtëm të Letonisë, Edgars Rinkevics.
Vendi i tij është mbështetës i zgjerimit të bllokut, një përkrahje kjo që buron edhe nga vet eksperienca e përjetuar prej Letonisë në këtë drejtim.
“Në vitet ’90, kur synonim anëtarësimin në BE dhe atë në NATO, përfitimi ishte i dyfishtë. Së pari, – shpjegon Rinkevics, – ishte në të mirë të zhvillimit tonë. Procesit të reformave, atyre politike, ekonomike, sociale dhe të sistemit të drejtësisë. Së dyti besojmë se shtrirja e bllokut sjell stabilitet në sensin më të gjerë të mundshëm”.
“Duke kujtuar se çfarë ndodhte asokohe në rajonin e Ballkanit – thotë zyrtari i lartë në intervistën e dhënë “European Ëestern Balkans”, – besojmë se vendet e rajonit janë gati, i kanë përmbushur kriteret dhe kanë implementuar reformat, ndaj, nëse të gjithë biem dakord në Bashkimin Europian, atëherë procesi i zgjerimit duhet të vazhdojë”.
Kryediplomati letonez sqaron se cilat janë prioritetet e vendit të tij, kur vjen fjala tek aderimi. Implementimi i reformave sigurisht renditet në krye, por peshë të madhe ka edhe rreshtimi me politikën e jashtme e atë të sigurisë së BE-së, një nevojë kjo e paraqitur sidomos pas aneksimit të Krimesë.
Në këtë drejtim, i vetmi vend që shqetëson Letoninë është Serbia. Duke prekur edhe njëherë çështjen e shumëdiskutuar të ndikimit rus në rajon, Rinkevics i mëshon idesë se Moska e ka më pak të vështirë të luajë me vendet jo anëtare, sesa me ato që janë tashmë pjesë e klubit, qoftë nëse bëhet fjalë për Bashkimi Europian, apo edhe për NATO-n.
a.ç
