Dita e parë e ngjarjes më të madhe në fushën e bibliotekave në Kosovë i është kushtuar shkrimtarit shqiptar të njohur ndërkombëtarisht, Ismail Kadare.
Me konferencën shkencore “Ismail Kadare – leximi dhe interpretimi” dhe me ekspozitën “Qytetet e Kadaresë” të martën është hapur edicioni i 14-të i “Javës së Bibliotekës në Kosovë” në Bibliotekën Kombëtare të Kosovës, “Pjetër Bogdani”, shkruan “Koha Ditore”.
Në konferencë krijimtaria e Kadaresë është trajtuar nga këndvështrime të ndryshme e ndër të tjera ai është cilësuar si shkrimtari, i cili e bëri të njohur edhe letërsinë shqiptare, e cila, ani pse kishte katër shekuj që ekzistonte, ishte pak e njohur përtej kufijve.
E në hollin e “Pjetër Bogdanit” kanë zënë vend botime të ndryshme të veprave që përshkruajnë qytetet shqiptare në mesin e të cilave “Kronikë në gur” e “Mjegullat e Tiranës”. Pjesë e ekspozitës janë edhe dorëshkrime e intervista të shkrimtarit.
E njëjta ekspozitë ishte hapur edhe në Bibliotekën Kombëtare të Shqipërisë më 28 janar të këtij viti, pikërisht në ditën kur shkrimtari me nam mbushi 80 vjet.
Tryezat shkencore e inaugurimi i shtëpisë së restauruar të Kadaresë në Gjirokastër ishin ndër aktivitetet e organizuara në fund të janarit në Shqipëri në kuadër të “Vitit të Kadaresë”.
E në ditët e “Javës…” në Kosovë ekspozita e konferenca janë aktivitetet e para që organizohen për nder të shkrimtarit. Në hollin e bibliotekës ku ka zënë vend edhe një pano me portretin e Kadaresë në sfond të të cilit është qyteti i tij i lindjes, Gjirokastra, drejtoresha e Bibliotekës Kombëtare të Shqipërisë, Persida Asllani, ka thënë se për ekspozitën institucioni që ajo udhëheq ka vendosur të zgjedhë një pamje specifike të veprës së Kadaresë, e cila ka filluar të kristalizohet dhe të bëhet e dukshme me qytetet për të cilat shkruan shkrimtari.
“Ekspozita është një lloj ftese për një udhëtim letrar në veprën kadareiane. Kemi vërtet dukurinë e shkrimit të qytetit në veprën e Kadaresë. Në ekspozitën që kemi hapur në Tiranë e kemi shoqëruar me imazhe të simbolikave të qyteteve për të cilat ka shkruar më shumë.
Për fat të keq të një defekti në transport panelet e mëdha të imazheve nuk mund të jenë në këtë ekspozitë”, ka thënë Asllani. Sipas saj në veprat që prezantohen në ekspozitë është një rrugëtim që krejt natyrshëm lind me qytetin e Gjirokastrës, duke gërshetuar krijimin e saj që nga bërthama.
