Leo më pranë ëndrrës për t’u ngritur në këmbë
Dëshira më e madhe e Leos po realizohet. Ai do t’i nënshtrohet ndërhyrjes kirurgjikale për t’u ngritur në këmbë, pas sigurimit të shumës së parave për kryerjen e operacionit final.
Djaloshi i quajtur Laert, por i njohur nga të gjithë si Leo, i cili vuan nga një sëmundje e rrallë, ka shkuar në Athinë, ku do të kryejë ndërhyrjen kirurgjikale. Leart Hasanllari është vetëm 6 vjeç dhe ka vuajtur që në lindje prej një sëmundjeje, e cila quhet “osteogenesis imperfecta”, një anomali që ka të bëjë me dobësimin dhe deformimin e kockave të këmbëve. Është operuar 7 herë dhe pret të kryejë operacionin final, i cili do të kryhet në Greqi.
Prindërit e tij lëshuan një apel për të mbledhur shumën e kërkuar nga mjekët, plot 40 mijë euro, që i biri të kryente ndërhyrjen e fundit kirurgjikale. Thirrja e familjes Hasanllari preku qytetarë, artistë, politikanë dhe biznesmenë në vend, të cilët dhanë kontributin e tyre. Apelit iu bashkuan edhe ministri i Brendshëm, Saimir Tahiri dhe deputeti i Vlorës, Koço Kokëdhima, duke ofruar një shembull sensibilizimi për të gjithë.
Siç ka treguar nëna e Leos, Anxhela, shuma prej 40 mijë eurosh është dashur për të mbuluar shpenzimet e dy aparaturave që do të vendosen në gjunjët e djalit, dy shtiza që do të vendosen në pjesën e poshtme të kofshës, klinikën private, mjekët që do të marrin pjesë në operacion dhe ilaçet, që janë shumë të kushtueshme.
Trajtimet e Leos kanë filluar që kur ka lindur dhe deri tani, ai iu është nënshtruar katër operacioneve në Spitalin Ushtarak. Vogëlushi ka bërë katër ndërhyrje në Shqipëri, nga të cilat nuk ka pasur asnjë rezultat, si dhe tre në Greqi.
Jeta e Leos është ndryshe nga e bashkëmoshatarëve të tij. Nuk mund të ecë dhe i ka kaluar shtatë vitet e jetës shtrirë, me thika dhe allçi. Dita e tij nis dhe përfundon shtrirë, por shpresa se edhe ai do të ngrihet në këmbë nuk është venitur në sytë e tij. Ka luftuar me jetën në salla operacioni dhe kjo është beteja finale, të cilën duhet ta fitojë për t’u ngritur në këmbë, si gjithë shokët dhe shoqet e moshës së tij.
