Minuta ankthi e tmerri në rrugën e Librazhdit
Minuta ferri në rrugën nacionale të Librazhdit. Një rrëshqitje masive shkëmbinjsh dhe dheu kanë bllokuar pothuajse plotësisht 4-5 km rrugë. Bllokimi nis që nga vendi i njohur si ‘Klubi i Gjuetarit’ dhe deri në hyrje të Librazhdit.
Mund të kalohet vetëm me një korsi, sepse ana e rrugës nga mali është bërë e pakalueshme dhe bllokuar nga gurë të mëdhenj. Rreth orës 19:30 e gjithë zona u përfshi nga një rrebesh i jashtëzakonshëm shiu, c’ka e bëri situatën dramatike.
Dhjetëra makina ndaluan në pamundësi për të vijuar më tej. Të vetmet mjete që qarkullonin ishin kamionë të mëdhenj dhe karoatrecat për të marrë makinat e dëmtuara. Asnjë shenjë ndërhyrjeje nga autoritetet. Rruga ka trafik të jashtëzakonshëm edhe pse shumëkush është duke nxituar për të mbërritur në netët korçare të birrës, por kësaj radhe, këtë të premte për shumëkënd kjo rrugë ishte shumë e gjatë, e gati gati e pamundur.
