Më në fund Federata e Boksit e Kosovës (FboxK) ia ka hapur dyert legjendës së boksit Aziz Salihut.
Ky i fundit prej vitesh është ankuar se është lënë jashtë shtëpisë së boksit dhe çdo organizate tjetër sportive dhe se e kishte të pamundur të kontribuonte në interes të suksesit kosovar në arenën ndërkombëtare.
Por, jo vetëm kaq. Duke mbetur krejtësisht jashtë sportit, Salihu ankohej se e kishte të pamundur ta siguronte një mirëqenie sociale, pasi nuk kishte faretë ardhura financiare.
Para pak muajsh ai ishte i sëmurë, por ishte shëruar në Turqi dhe kur shëndeti i tij u përmirësua u është kthyer kërkesave për angazhim në FboxK ose në Komitetin Olimpik të Kosovës (KOK).
Por, është shtëpia e boksit ajo që ia hapi dyert sportistit të shekullit. FboxK-ja ka vendosur t’ia japë një pozicion Salihut. Detyra të cilën do ta kryejë “Zizi” ende nuk është zyrtarizuar, por punësimi i tij në FboxK është konfirmuar, raporton Zëri. (b.an)
