Drejtori i Autoriteti Rrugor Shqiptar, (ARRSH) Ami Kozeli, njoftoi se të hënën do të nisë përcaktimi i afateve për ndërtimin e rrugës alternative në trupin lumor, pranë hekurudhës, duke u bazuar në rezultatet e sondazheve gjeologjike dhe mobilizimin e plotë të kontraktorëve dhe institucioneve përgjegjëse për realizimin e këtij segmenti që është pjesë e Korridorit VIII.
Kozeli, së bashku me Administratorin e Hekurudha Shqiptare, Ergys Verdho inspektuan nga afër ecurinë e punimeve në zonën e quajtur “Arrat e Gurrës”, në Dragostunjë të Librazhdit, ku vijon ndërhyrja pas rrëshqitjes së masive të dherave, që prej javës së kaluar.
Gjatë deklaratës për mediat, Kozeli bëri të ditur se punimet po vijojnë me ritme të përshpejtuara dhe se në terren po punohet 24 orë në 24, me mjete të rënda dhe punëtorë të shtuar, të organizuar në dy turne nga 12 orë secili. Sipas tij, çdo ditë po largohet një sasi e konsiderueshme dheu nga trupi i rrugës së rrëshqitur, me qëllim stabilizimin e skarpatës dhe krijimin e kushteve për kryerjen e shpimeve gjeologjike.
Kozeli theksoi se Shërbimi Gjeologjik ka përcaktuar katër pika për kryerjen e sondazheve. Një prej tyre ka përfunduar, ndërsa e dyta pritet të realizohet gjatë ditës së sotme, teksa po përgatitet terreni për vendosjen e sondës. Dy pikat e tjera do të realizohen gjatë ditës së nesërme.
Ai nënvizoi se ekziston një mobilizim i plotë nga kontraktorët e ARRSH-së, Shërbimi Gjeologjik dhe të gjitha institucionet e linjës. “Sot në mëngjes diskutuam planin e punës dhe jemi drejt përcaktimit të afateve për realizimin e rrugës alternative në trupin lumor, në krah të hekurudhës”, u shpreh Kozeli.
Sipas tij, rezultatet gjeologjike mund të hapin mundësinë edhe për një alternativë tjetër zgjidhjeje në vijim, në varësi të kushteve të terrenit. Ai sqaroi gjithashtu se punimet në këtë segment nuk ndikojnë në ndryshimin e projektit të Korridorit VIII, por pas përfundimit të analizave dhe ndërhyrjeve do të zhvillohet një takim me të gjithë aktorët për të mbajtur një qëndrim përfundimtar mbi këtë pikë.
Nga ana e tij, Administratori i Hekurudhës Verdho u shpreh se, nëse do të jetë e nevojshme ndërtimi i veprave të reja të artit, përfshirë tunele apo zgjerime, ato do të realizohen në përputhje me projektin e Korridorit VIII, i cili parashikohet të jetë i elektrifikuar.
Sipas tij, në varësi të rezultateve gjeologjike do të shqyrtohen edhe projektet e ardhshme për këtë segment strategjik infrastrukture.
