Anatoliy Tymoshchuk është lojtari me më shumë ndeshje në historinë e kombëtares së Ukrainës. Saktësisht, ai ka luajtur 144 ndeshje në nivel ndërkombëtar midis viteve 2000 dhe 2016.
Ish-mesfushori, gjithashtu ka qenë kapiten i kombëtares së vendit të tij për katër vite, përpara se “t’i varte këpucët në gozhdë” dhe të vazhdonte si trajner. Ai ka shërbyer si zv.trajner i Zenit për pesë sezonet e fundit.
Federata e Futbollit të Ukrainës dëshiron që Tymoshchuk të dënohet për heshtjen e tij në mes të konfliktit të vazhdueshëm ushtarak të Rusisë, duke i hequr njohjen e ndeshjeve ndërkombëtare dhe licencën e trajnerit.
Një numër i madh ish-lojtarësh dhe lojtarësh aktualë të kombëtares ukrainase e kanë kundërshtuar luftën dhe kanë premtuar mbështetje për civilët që kur presidenti rus Vladimir Putin urdhëroi pushtimin e Ukrainës. Tymoshchuk tani akuzohet se punon “për klubin e agresorit”.
Federata e Futbollit e Ukrainës bën gjithashtu thirrje që 42-vjeçarit t’i hiqen medaljet që fitoi me Shakhtar Donetsk, si dhe çmimet e të gjitha shteteve e titujt e nderit: “Që nga fillimi i agresionit ushtarak të Rusisë kundër Ukrainës, Tymoshchuk, ish-kapiteni i Kombëtares së Ukrainës, jo vetëm që nuk bëri asnjë deklaratë publike në lidhje me këtë, por as nuk e ndërpreu bashkëpunimin me klubin e agresorit.
Në një kohë kur një tjetër nga ish-klubet e ukrainasit, FC Bayern Munich, publikon deklarata dhe ndërmerr aksione në mbështetje të Ukrainës, Tymoshchuk vazhdon të heshtë dhe të punojë për klubin e agresorit. Duke bërë këtë zgjedhje të vetëdijshme, Tymoshchuk dëmton imazhin e futbollit ukrainas dhe shkel klauzolën 1.4″.
Deklarata e Federatës së Futbollit të Ukrainës vjen pas asaj të yllit të Atalantës, Ruslan Malinovskyi, i cili këmbënguli se Tymoshchuk nuk mund të shihet më si një legjendë e futbollit në vend: “Unë nuk e di pse nuk flet Tymoshchuk, duhet ta pyesni atë.
Vështirë të komentohet, por është e çuditshme pse ai nuk ka folur. Mendoj se nuk është e drejtë. Është 100% rasti për të thënë se ai nuk është më (ose do të jetë ndonjëherë) legjendë e futbollit ukrainas. Arritjet e tij të mëparshme janë harruar”.
/b.h
