As Lëvizja Vetëvendosje nuk i ka shpëtuar gjobave nga Paneli Zgjedhor për Ankesa dhe Parashtresa (PZAP), që mëngjesin e sotëm vendosi të dënojë LDK me 20 mijë euro gjobë për shkak se një prej kandidateve për deputete nga radhët e tyre e krahasoi Albin Kurtin me Adolf Hitlerin.
Partia në pushtet është dënuar me 3 mijë euro gjobë për shkak të gjuhës denigruese që ka përdorur kryetari i saj Albin Kurti në disa prej tubimeve të fushatës për zgjedhjet e 9 shkurtit.
Ankesa për gjuhën e përdorur nga kryeministri përkundrejt kundërshtarëve politikë është bërë nga Lidhja Demokratike e Kosovës.
“Pranohet pjesërisht e bazuar ankesa e subjektit politik Lidhja Demokratike e Kosovës (LDK), me seli në Prishtinë, Anr.30/2025 e datës 14.01.2025, ashtu që subjektit politik Lëvizja Vetëvendosje (LVV), me seli në Prishtinë, për shkak të shkeljes së Kodit të Mirësjelljes për Subjektet Politike, Mbështetësit e tyre dhe Kandidatët, i shqiptohet dënimi më gjobë në lartësi prej 3,000.00 (tremijë) euro”, thuhet në vendimin e PZAP-së.
Në ankesën e LDK-së dorëzuar në PZAP, janë prezantuar tri video të Kurtit ku dëgjohet ky i fundit duke përdorur gjuhë të papërshtatshme ndaj dy partive opozitare LDK dhe PDK, të cilave u referohet si “LËDËKYHI dhe PËDËKYHI”.
“Parashtruesi i ankesës i citon thëniet ne vazhdim: Prandaj, kur na rastis të dëgjojmë ndonjë udhëheqës të LËDËKYHIT që thotë se po i pëlqen populli, populli ka simpati për ta, kjo mu (flet për veten Kurti) mi përngjan asaj mizës (krahasim fyes, bullizues, nxitës e provokuese) që thoshte kudo që po shkoj po më presin me duartrokitje (ironizon me gjestikulacion dhe shprehje të çuditshme dhe të pakontrolluara të fytyrës).”
Tutje parashtruesi i ankesës thekson se pra, “kur ata thonë që populli po i pëlqen ata është si ajo miza që lëvdohej që njerëzit po e presin me duartrokitje e ju e dini shumë mirë që me ato duar që duartrokasin çfarë janë duke provuar t’i bëjnë asaj mize (aludon në një krahasim të rëndë që tejkalon metaforën e kthehet në gjuhë provokuese të urrejtjes ndaj tjetrit-në këtë rast ndaj udhëheqësit të LDK-së).”
