Forcat RENEA dhe ato të FNSH-së po vijojnë që prej orëve të para të mëngjesit operacionin në fshatin Lazarat.
Me mjete të blinduara dhe shumë forca në terren po vazhdon kontrolli banesë më banesë për të gjetur armët dhe personat e grupit të zjarrit, dhe veçanërisht vrasësit e efektivit të policisë, Ibrahim Basha.
E para që është kontrolluar ishte banesa e vëllezërve Aliko, të akuzuar si anëtarë të grupit të zjarrit si edhe banesa e Sebastian Shurdhit. Ky i fundit u dorëzua në Fier dhe është shoqëruar nga policia në Komisariatin e Gjirokastrës.
Kontrollet po vazhdojnë në çdo banesë me shumë imtësi dhe me masa të rritura vigjilence. Policia kërkon dorëzimin e të kërkuarve dhe nëse ata reagojnë me armë do të asgjësohen.
Ndërkohë me anë të një njoftimi, Policia e Shtetit bën të ditur se gjatë kontrolleve të kryera nga forcat RENEA, janë shoqëruar në polici 45 persona, 2 prej të cilëve janë arrestuar, 24 vijojnë të merren në pyetje nga grupi hetimor, ndërsa 18 të tjerë janë lënë të lirë. Rreth orës 20:00 policia njoftoi se ka ndaluar edhe dy persona të tjerë lidhur me ngjarjet në Lazarat. Klodjan Selimi dhe Aleksandër Basha janë ndaluar gjatë kontrollit të banesa.
