Kryetari i Partisë Demokratike Lulzim Basha ishte në spitalin “Nënë Tereza” në Tiranë ku vizitoi nga afër gjendjen shëndetësore të dy efektivëve të plagosur të policisë në Lazarat mëngjesin e sotëm. Në një prononcim për mediat, Basha e cilësoi këtë si një ngjarje të rëndë, ndërsa shprehur ngushëllimet për familjarët e të vrarit Ibrahim Basha.
Por kreu i demokratëve nuk i shpëtoi dot tundimit për të iu përgjigjur në distancë deklaratave të kryeministrit Edi Rama, për ata që flasin me dy kuptime, duke nënkuptuar PD. Në reagimin e tij lideri i selisë blu thekson se nuk është aspak dykuptimësi të dënosh aktin e rëndë kriminal si dhe të kërkosh transparencë lidhur me atë që po ndodh në Lazarat.
Madje sipas Bashës, grupi i policisë që u godit me armë zjarri, nuk ishin në një automjet të përshtatshëm për një aksion policor.
“Shpreh ngushëllimet e mia familjarëve të Ibrahimit. Vizituam dy kolegët e tij, Perlat Hamitaj dhe Jetmir Isaj të cilët famtirësisht janë me plagë të lehtë. I uroj një shërim të shpejtë. Keni kërkuar që në orët e para që policia të marrë të gjitha masat që të mos cënohen civilët, autorët të ndalen para ligjit. Kemi kërkuar transparencë. Një fakt shqetësues, është se i gjithë grupi që është goditur i policisë, kanë qenë me një automjet të papërshtatshëm. Ky nuk është momenti për t’u ndalur këtu, por vrasja dhe plagosja e policisë duhet parë me objektivitet dhe pa ngjyrime politike. Kryeministri i vendit, është njeriu që duhet të bëjë transparencë për këtë ngjarje. Nuk ka asgjë të dukuptimtë dënimit që ne i bëjmë këtij akti kriminal. Nuk ka asgjë të dykuptimtë në kërkesën e të bërit transparencë.” tha Basha
