Tashmë në Shqipëri do të ofrohet një shërbim i ri, ai i avionëve “taksi”, që do të ofrojnë udhëtime për një numër të vogël personash me kapacitet 8 veta. Shërbimin e ri do ta sjellë në treg, duke nisur nga kjo e mërkurë, kompania “Shega Air”.
“Që nga dita e sotme në Shqipëri do të ketë një shërbim të ri të shërbimit ajror që do të jetë avioni taksi i promovuar nga kompania “Shega Air”, pjesë e grupit “Shega Trans”. Me këtë lloj avioni do të ketë mundësi të ketë shërbime turistike, shërbime ambulance dhe udhëtime në vende të ndryshme të europës. Aktualisht në këtë avion përfshihen 8 persona, ky është mjeti i parë dhe deri në fund të vitit do të kemi një tjetër avion që do të transportojë 16 persona. Ky është i pari avion në të gjithë Europën juglindore, një shërbim i ri që ofrohet vetëm nga ne.”-tha Ervin Shijaku, administrator i “Shega Trans”.
Me anë të këtij avioni kompania ofron transport edhe për emergjencat shëndetësore. Ndaj dhe brenda 2015 drejtues të kompanisë garantojnë klientët se flota do të shtohet me një tjetër avion me kapacitet deri në 16 persona. Ndërsa prej gati dy vitesh helikopterët taksi janë një normalitet për klientët besnikë të “Shega Air”.
