Ajo është sportistja e vetme që mban me shpresa Shqipërinë për një medalje olimpike në Rio de Janeiro, por në prag të garimit të saj në garën e 3.000 metrave me pengesa, atletja nënkampione e Europës, Luiza Gega, vijon të ketë probleme me tendinën e Akilit.
Probleme këto që i kushtëzojnë asaj formën optimale në këtë olimpiadë, transmeton top-channel.
Nga sa raportohet, 28-vjeçarja i është nënshtruar një terapie intensive për të eliminuar sa më shumë të jetë e mundur dhimbjet, që i janë rikthyer pas stërvitjeve intensive në Rio, edhe pse gjatë stërvitjes në Dardhë të Korçës dukej se gjithçka po lihej pas.
Luiza Gega do të jetë një nga 56 atletet që do të garojnë në 3.000 metra me pengesa, ku konkurrenca është shumë e fortë. Rekordmenia e Shqipërisë pritet të zbresë në pistë sipas programit në orën 15:05, pasi bën pjesë në baterinë e parë kualifikuese.
Nëse do të kualifikohet në finale, Luiza Gega do të tentojë zonën e medaljeve në garën që do të zhvillohet më 15 gusht.
Gega shkroi se është gati për këtë ditë të madhe, edhe përkundër se nuk është në njëqind përqindëshin e saj. Ja si shkruan ajo:
Gati per neser. Dhe pse ndoshta jo ne 100% te formes time pasi demtimi ne tendine mbas Kampionatit Europian me ka lene pak mbrapa me stervitjen speciale te pengesave perseri do jap maksimumin tim. Jan Lojrat e para Olimpike per mua dhe dua ti shijoj ne maksimum.Gjithsesi sporti per mua nuk mbyllet ketu lojrat e ardhshme vijn me shpejt se ci mendojm dhe une do te vi me synime shume me te medha. Ndihem shume me fat qe kam nje mbeshtetje shume te madhe nga njerzit ku urime pa fund akoma vazhdojn te me vijn. (b.an)
