Përfaqësuesi i BE-së për Dialogun Beograd-Prishtinë dhe çështje të tjera rajonale të Ballkanit Perëndimor Miroslav Lajçak, ka thënë se BE-ja duhet ta kryejë punën e papërfunduar kur bëhet fjalë për integrimin e Ballkanit Perëndimor.
Në një shkrim në Twitter, nga Forumi i Dubrovnikut, Lajçak ka thënë se lufta në Ukrainë ka ndryshuar gjithçka dhe e ka kthyer sërish në çështje politike zgjerimin e BE-së.
“Për kohë të gjatë, ne ishim të vetëkënaqur. Kjo s’mund të vazhdojë më. Ne duhet ta përfundojmë punën tonë të papërfunduar kur bëhet fjalë për integrimin e Ballkanit Perëndimor”, ka shkruar ai.
Kujtojmë që sot në një deklaratë të përbashkët, SHBA dhe BE thanë se avancimi i rrugës së Shqipërisë dhe Maqedonisë së Veriut në BE është çelësi për forcimin e kohezionit dhe qëndrueshmërisë së të gjithë kontinentit evropian./m.j
