Analisti Ergys Mërtiri thotë se problemi i ditëve të sotme është se rrugaçëria është kthyer në vlerë. I ftuar në emisionin “Opinion” në Tv Klan, Mërtiri shprehet se janë përmbysur vlerat dhe nuk identifikohet dot se me kë jemi në betejë.
Gjatë fjalës së tij, Mërtiri ka trajtuar dhe rastin e vrasjes së 14-vjeçarit me thikë nga bashkëmoshatari i tij në afërsi të shkollës “Fan Noli” në Tiranë.
Ergys Mërtiri: Ai ndihet hero me krimin.
Blendi Fevziu: Ajo ishte edhe më tronditëse se akti në vetvete.
Ergys Mërtiri: Problemi se është kthyer në vlerë rrugaçëria. Kemi rënë viktimë e një përpjekje për t’u dukur trima. Nuk është vlerë të jesh modest. Ne kemi përmbysur vlerat. Jemi shoqëri ku hori, i forti, rrugaçi fiton, ja del me korrupsion. Ky që ka gjuajtur me thikë, as i fortë nuk është se e fsheh thikën. Këta janë legena, këta janë banalë. Problemi është se shoqëria nuk reagon. Nuk e shqetëson kënd.
Duhet të na shqetësojë edhe një gjë: Prindërit nuk janë të gjithë doktorë shkencash dhe nuk ka pse të jetë. Shoqëria dikur ka pasur modele të tjera. Sot, në kohën e komunikimit masiv, modelet janë repista idiotë. Modelet janë këto dhe ne nuk identifikojmë me kë jemi në betejë. Ku është sistemi i vlerave këtu? Nëse kryeministri pozon me figura që duhet të ishin e kundërta e modeleve që duhet të na japë shteti.
