Kryeministri Ramush Haradinaj pritet që t’ia prezantojë homologut të tij malazez, Dushko Markoviq, një plan për kalimin e Marrëveshjes së Demarkacionit në Kuvendin e Kosovës.
Kështu bëjnë të ditur burime të gazetës “Zëri”, sipas të cilave gjatë vizitës së Markoviqit në Kosovë javën e ardhshme, më 6 shkurt, këtij do t’i prezantohet varianti i një plani, sipas të cilit kjo marrëveshje do të mundë të rinegociohet sërish.
“Pala kosovare është optimiste se ky plan do të përkrahet edhe nga pala malazeze, i cili parasheh mundësinë e rinegocimit të Marrëveshjes për Kufirin në mënyrë që të plotësohet kriteri i BE-së për liberalizim të vizave, si dhe me dëshmi konkrete kufiri të vendoset aty pretendon pala kosovare”, ka pohuar ky burim, shkruan tutje Gazeta ‘Zëri’.
Në këtë mënyrë, siç mëson gazeta, më vonë do të mundë të diskutoheshin sërish të gjitha pikat të cilat janë të kontestueshme nga ana e Kosovës.
Megjithatë, zyrtarë nga Qeveria e Kosovës nuk kanë dhënë detaje lidhur me këtë çështje, ani pse kanë pohuar se janë pro asaj që të gjendet një zgjidhje. (b.an)
