Rreth orës 11:00 pritet që të nisë seanca plenare, por ndryshe nga herët e tjera nuk parashikohet që të ketë debate, pasi opozita e ka bojkotuar Kuvendin pas nisjes së protestës para godinës së Kryeministrisë.
Kryetari i PD, Basha deklaroi dje se Kuvendi i opozitës është në shesh, ndërsa bojkoti do të sjellë edhe bllokimin e ngritjes së Komisioneve të Vettingut që janë parashikuar që të marrin forma brenda dy javëve.
Megjithatë në rendin e ditës së seancës plenare sot do të diskutohet për projektligjet për “Për të drejtat dhe mbrojtjen e fëmijës”, “Për ratifikimin e marrëveshjes së huas, ndërmjet Republikës së Shqipërisë dhe Bankës Ndërkombëtare për Rindërtim dhe Zhvillim, për financimin e projektit për zhvillimin e integruar urban dhe të turizmit”, “Për ratifikimin e marrëveshjes së huas, ndërmjet Republikës së Shqipërisë, përfaqësuar nga ministria e Financave, “Huamarrësi”, dhe KFV Frankfurt “KFV”, për programin e menaxhimit të mbetjeve të ngurta, rajoni Vlorë”.
Gjithashtu do të miratohet programi i punimeve të Kuvendit për periudhën 27 shkurt – 7 Prill dhe kalendari 3 javor i punimeve për periudhën 27 shkurt -17 mars. /ma.me
