Kuvendi miraton Akti Normativ për ndryshimet në buxhet
Kuvendi miratoi me 74 vota pro dhe 23 kundër pas më shumë se 10 orësh debate, Aktin Normativ për disa ndryshime në ligjin e buxhetit të vitit 2015, përmes së cilit qeveria planifikon uljen e të ardhurave.
Ndërsa rishikimi i buxhetit u kritikua nga opozita. Kjo e fundit tha se më shumë se nevoja për ndryshimin e buxhetit nevojitet ndryshimi i modelit qeverisës. Sipas saj, modeli ekonomik i qeverisë është i dështuar. Ish ministri i Financave, Ridvan Bode deklaroi se grupi parlamentar i Partisë Demokratike nuk do të votojë Aktin Normativ për ndryshimet në buxhet, ndërsa i bëri thirrje qeverisë të reflektojë mbi shkaqet që sjellin në një situatë të tillë dhe të lerë mënjanë akuzat ndaj opozitës.
Ministri i Financave Shkëlqim Cani mbrojti aktin normativ të Qeverisë për ndryshimet në buxhetin e shtetit, duke i cilësuar ato si të domosdoshme për rritjen ekonomike dhe për t’iu përshtatur ndarjes së re të territorit. “Ky akt normativ është i domosdoshëm për t’i dhënë zhvillimin e duhur rritjes ekonomike”, tha ministri Cani. Akti Normativ parashikon shkurtimin e të ardhurave me mbi 16 miliardë lekë. Ministri i Financave Cani, argumentoi se shkak për këtë është modeli i ri ekonomik i vendit që po zhvendoset nga importet tek prodhimi vendas dhe jo nga paaftësia e qeverisë për të grumbulluar tatimet dhe taksat.
Ndërsa ministri i Zhvillimit Ekonomik, Sipërmarrjes dhe Turizmit Arben Ahmetaj deklaroi se ekonomia shqiptare po njeh rritje. “Në 2014 ka pasur një rritje reale me 2.1 për qind dhe kjo është një statistikë kokëfortë që rrëzon sofizmin e kujtdo. Vetëm në tremujorin e parë të 2015-s investimet e huaja llogariten me 268 milion dollarë. Për të njëjtën periudhë, ekonomia shqiptare u rrit me 2.82 për qind, ndërkohë që në vendet partnere po shënohet rënie e GDP-së”, tha Ahmetaj. Ekonomia shqiptare po rritet dhe në mungesë të kreditimit, shtoi ai.
Ndryshimet e buxhetit përmes Aktit Normativ do të bëjnë të mundur, sipas relacionit, krijimin e kushteve optimale, me kuadër ligjor adekuat dhe fonde të nevojshme buxhetore për funksionimin e pushtetit vendor dhe fillimin e zbatimit të reformës së re administrativo-territoriale, si dhe rialokimin e burimeve të financimit të investimeve, nga financim i huaj në financim të brendshëm, duke garantuar që investimet të realizohen efektivisht dhe njëkohësisht ekonomisë t’i sigurohen incentivat e nevojshme për performim të mirë.
