Pas muajsh të tërë revolucioni, përplasjesh ndërmjet deputetëve, gazit lotsjellës, hedhjes së ujit etj Kuvendi i Kosovës është kthyer në gjendjen më të mërzitshme të mundshme- me fjalime të gjata dhe jo kreative të deputetëve. Prej aty është larguar opozita – në përjashtim të një deputeteje të VV’së e cila është kthyer në Kuvend për ta ruajtur mandatin.
Vendimi i partive VV, AAK e NISMA për t’i bojkotuar seancat e Kuvendit të Kosovës, ka kthyer “normalitetin” dhe debatin në institucionin ligjvënës, pas muajve të tërë gjuajtjesh me vezë, gazit lotsjellës, kontrolleve të rrepta, përjashtimeve të deputetëve, arrestimeve e përplasjeve të forta mes deputetëve e edhe pjesëtareve të sigurimit.
Por i gjithë debati të enjten po zhvillohet brenda Kuvendit, po bëhet mes vete nga deputetët e koalicionit qeverisës PDK-LDK, herë-herë duke u përfshirë edhe ata të minoriteteve. Krejt kjo në mungesë të opozitës. Megjithëse, pati edhe pyetje në drejtim të Albin Kurtit të VV’së.
Nga shtatori i vitit 2015, në Kuvendin e Kosovës, përjashtuar seancat solemne dhe atë të fjalimit vjetor të Presidentes Atifete Jahjaga, asnjë seancë tjetër nuk ka vijuar me rregull. Deputetët e “Opozitës së Bashkuar”, që kundërshtonin marrëveshjet e nënshkruara nga Kryeministri Isa Mustafa në Bruksel, gjatë verës së kaluar, për siç ata e quanin krijimin e “Zajednicës” dhe atë të Demarkacionit me Malin e zi, fillimisht nisen të gjuanin me ve në drejtim të Kryeministrit dhe zëvendësit të tij Hashim Thaçi.
Ata vazhduam me bllokim të foltores, e kur e panë se sigurimi u tregua më i fortë se këta deputetë, Opozita hodhën edhe gaz lotsjellës në Kuvend. Derisa, pushteti atyre ju përgjigj me vazhdim të seancave në një sallë alternative, e disa herë edhe me përjashtim të deputetëve nga seancat. As largimi me dhunë nga salla, nuk mungoi.
Njëjtë ndodhi edhe në seancën e 26 Shkurtit, kur Hashim Thaçi u zgjodh president i ri i vendit.
Megjithatë, Kuvendi pas fillimi të sesionit pranveror gjeti një zgjidhje për gjithë këtë situatë. Blerja e një ventilatori që nxjerr jashtë tymin e gazit lotsjellës, ia pamundësoi opozitës bllokimin tutje të punës së Kuvendit.
Kur e pa këtë situatë, ishte kreu i AAK’së, Ramush Haradinaj, i pari që hoqi dorë nga mandati i tij prej deputeti. E pas tij, jo dorëzim të mandatit por vetëm bojkot të seancave nisen të bëjnë edhe deputetët tjerë të partisë së tij.
Të njëjtin vendim më pas e morri edhe NISMA e Fatmir Limajt, për ta detyruar më pas edhe VV’në e Visar Ymerit në mënyrë që opozita të qëndrojë e bashkuar. Ndonëse, këta të fundit, bojkotin do ta bëjnë varësisht nga pikat e rendit të ditës që do të mbajnë seancat.
E në seancën e të enjtes, vetëm një deputete e opozitës u pa në Kuvend. Puhie Demaku e VV’së erdhi vetëm për ta ruajtur mandatin, pasi gjashtë muaj kishte munguar.
Por as ditën e enjte, nuk munguan kontrollet me skanerë tek hyrja e objektit, ndonëse shërbyen vetëm për deputetet e koalicionit, referon GazetaExpress.