Në nderim të figurës së ish-deputetit të Kuvendit të Shqipërisë, ish-ministrit të Mbrojtjes Luan Hajdaraga, i cili u nda nga jeta ditën e djeshme, pas një beteje të gjatë me sëmundjen, Kuvendi i Shqipërisë organizon homazhe në sallën e seancave plenare, ku do të marrin pjesë shumë personalitete të njohura të politikës.
Shumë figura e personalitete të njohura të politikës shprehën ngushëllimet familjarëve të ish-ministrit të Mbrojtjes ditën e djeshme, duke e cilësuar si një humbje të një eksponenti më të madh në Partinë Socialiste që në fillimet e saj. Si deputet në Kuvendin e Shqipërisë dhe si ministër i Mbrojtjes, Luan Hajdaraga njihet si një nga personalitetet, i cili dha një kontribut të paçmueshëm në Partinë Socialiste.
Në ceremoninë që po zhvillohet sot në sallën e seancave plenare, kanë marrë pjesë disa ministra të kabinetit Rama 2, figura të vjetra por edhe aktuale të Partisë Socialiste. Namik Dokle, e Servet Pëllumbi, deri më tani janë të pranishëm në homazhe. Kryetarja e LSI-së, Monika Kryemadhi ka qenë ndër të parat që ka mbërritur në ceremoninë e homazheve. Në homazhe ka marrë pjesë edhe presidenti i vendit, Ilir Meta, i cili shprehu konsideratën e tij për figurën e Hajdaragës. “Njeri i këndshëm dhe i përkushtuar për të përmbushur punën e tij. “-tha Meta.
Rama në ceremoninë e homazheve
Kryeministri Edi Rama ka marrë pjesë sot në ceremoninë e homazheve që u zhvillua në sallën e seancave plenare në Kuvendin e Shqipërisë. Kryeministri Rama ka takuar familjarët dhe u ka shprehur ngushëllimet, si dhe ka nderuar figurën e tij.
Kryeministri ka zgjedhur të mos flasë për gazetarët. Më herët në ceremoni kanë marrë pjesë kryetarja e LSI-së, Monika Kryemadhi, Presidenti Ilir Meta, e të tjerë figura të njohura të PS-së.
Kryemadhi përlotet: Hajdaraga më ka inkurajuar!
Kryetarja e LSI-së, Monika Kryemadhi, në fjalën e saj para hyrjes në ambientet e Kuvendit, tha se Hajdaraga do kujtohet, më së shumti nga Partia Socialiste. Kryemadhi është përlotur kur u pyet nga gazetarët për rolin e Hajdaragës në jetën e saj.
“E kam takuar Luanin kur kam qenë fëmijë. Luani më ka inkurajuar në shumë gjëra. Hajdaraga solli ndryshim në PS. Ikja e parakohshme, e dhimbshme, do na mungojë shumë të gjithëve, por më së shumti PS-së. Sot jemi këtu për të thënë vlerat që ka Luani, e klasës politike po i largohen. “-u shpreh Kryemadhi.
ma.me
