Mijëra njerëz janë mbledhur mbrëmjen e së premtes në sheshin “Sintagma”, në kryeqytetin grek Athinë, për të protestuar ndaj qeverisë si përgjegjëse sipas tyre, e tragjedisë hekurudhore, 2 vite më parë në Tempe. Kjo protestë po zhvillohet në një moment ku në kuvend po zhvillohet debat për një mocion mosbesimi të qeverisë së Mitsotakis.
Për shkak të protestës në qendër të Athinës, stacionet e metrosë “Syntagma” dhe “Panepistimio” janë mbyllur me urdhër të policisë, ku trenat kalojnë pa ndalur.
Më herët policia njoftoi ndalimin e 13 personave në lidhje me protestën.
Ndërkohë, një turmë e madhe është mbledhur edhe në sheshin Aristotelous të Selanikut dhe protesta po zhvillohen aktualisht në disa qytete të tjera të mëdha në të gjithë vendin.
Kjo shënon valën e dytë të mitingjeve këtë të premte, pas demonstratave të mëparshme të udhëhequra nga studentët që kërkonin drejtësi për viktimat e katastrofës hekurudhore Tempe të vitit 2023 në Athinë dhe qytete të tjera.
