Viti 2019 ishte një vit me intensitet të lartë zhvillimesh politike. Nisi me një opozitë dhe përfundoi me një tjetër në Parlament, protesta, zgjedhje pa opozitën, si dhe konflike institucionale.
Kronologjia e 12 muajve reflektohet edhe tek natyra dhe cilësia e motiveve për të cilat deputetët u drejtohen institucioneve për informacion: nga politika e kauzave të forta tek “sikletet” rutinë të elektoratit. Me një opozitë më pak impenjative, deputetët socialistë tashmë kanë kohë të kërkojnë më tepër të dhëna për spostimin e kabinës elektrike nr.7, si në rastin e Ervin Bushatit, apo Kongresin e Parë të Grave Antifashiste Berat, si në rastin e Ermonela Felajt.
Në fakt, kryetarja e Komisionit të Sigurisë Kombëtare ka qenë mjaft aktive, sipas dokumentit të publikuar nga Kuvendi, për çështje që lidhen me zonën e saj elektorale, duke kërkuar dhe shtesë buxheti për Bashkinë e Kuçovës, investime në spital, apo rehabilitimin e shtëpive të familjeve rome në atë qytet.
Me çështje të energjisë elektrike apo pastrim kolektorësh për zonën e saj është marrë dhe Antoneta Dhima. Vasilika Hysi, Elona Gjebrea apo Xhemal Qefalia janë fokusuar në çështje që lidhen me objektin e punës së komisioneve ku bëjnë pjesë, si mbrojtja e pakicave, rezultatet e luftës antitrafik apo dhe siguria kombëtare pas deklaratave të Presidentit të Republikës se në 8 qershor mund të digjej Parlamenti.
Pikërisht mbi Presidentin e Republikës duket se ka qenë pjesa më e madhe e shkresave të drejtuara nga nënkryetari i Kuvendit, Myslym Murrizi, drejtuar institucioneve të sigurisë dhe shërbimeve të inteligjencës. Numri i kërkesave të tij është pak më i ulët se ai i Albana Vokshit. Para daljes së opozitës nga Parlanenti, ish-kryetarja e Komisionit të Medias dhe Edukimit, ka qenë më aktivja në mbledhjen e informacioneve nga institucionet shtetërore për t’u përballur në Kuvend apo komisione me kolegët e mazhorancës.
Jorida Tabaku nga Komisioni i Ekonomisë, apo Grida Duma nga ai Mirëqenies Sociale e Shëndetësisë po ashtu kanë regjistruar një numër të lartë kërkesash.
Kontratat koncensionare, rimbursimi i medikamenteve apo dhe doktoratura e ministres Manastrliu ishin kauza të opozitës së shkuar parlamentare, bazuar mbi informacione shtetërore. Informacione të cilat tashmë janë më tepër lokaliste. (a2)
