Juristi Edmond Petraj, i ftuar në emisionin “Puls” në A2 CNN nga Bruna Çifligu, ka komentuar dy nga çështjet më të nxehta të aktualitetit juridik dhe politik, shqyrtimin në Gjykatën Kushtetuese të ankimimit të kryeministrit Edi Rama për pezullimin e Belinda Ballukut dhe debatin rreth gjyqtares Irena Gjoka.
Lidhur me seancën e 22 janarit në Gjykatën Kushtetuese, Petraj u shpreh se pret që Kushtetuesja t’i japë të drejtë kryeministrit Rama. Sipas tij, pezullimi i një ministri nuk mund të bëhet përmes rrugës gjyqësore, pasi Kushtetuta ia njeh këtë kompetencë vetëm kryeministrit.
“Një ministër ose emërohet, ose shkarkohet nga kryeministri. Pezullimi nuk është parashikuar si mekanizëm”, theksoi ai, duke shtuar se vendimi i Kushtetueses do të shërbejë për të vendosur qartë vijën e demarkacionit mes pushtetit ekzekutiv dhe atij gjyqësor.
Sa i përket çështjes së gjyqtares Irena Gjoka, Petraj u shpreh se nuk ka asnjë përgjegjësi penale ndaj saj, pavarësisht konfirmimit të një dënimi të vjetër në Greqi. Ai e cilësoi gjithë këtë debat si “manovër greke” dhe “lojë politike”, që sipas tij po përdoret nga Fredi Beleri dhe figura të tjera për qëllime politike dhe për të krijuar pengesa në procesin integrues të Shqipërisë.
Petraj theksoi se një vendim penal i huaj nuk ka asnjë efekt juridik në Shqipëri pa u njohur zyrtarisht dhe se ligji i dekriminalizimit nuk është i zbatueshëm në këtë rast.
