I dërguari e dhëndri i Donald Trump, Jared Kushner dhe kryeministri izraelit Benjamin Netanyahu, arritën një marrëveshje për të gjetur një rrugë përpara për konfliktin në Gaza.
Një zyrtar i Bordit të Paqes tha për Reuters se takimi ishte i gjatë, i thelluar dhe shumë produktiv. Ndërkohë një tjetër zyrtar tha për Al Jazeera-n se sipas marrëveshjes, forcat izraelite nuk do të ridislokohen ose largohen nga Gaza, derisa Hamasi të çarmatoset plotësisht.
Sipas këtij burimi, delegacioni i udhëhequr nga Kushner dhe Netanyahu ranë dakord që “të gjitha armët e rënda dhe të lehta e tunelet e lehta do të çmontohen në mënyrë që të mos përdoren përsëri” nga Hamasi.
Zyrtari i Bordit të Paqes tha për Al Jazeera-n se ekziston gjithashtu një mirëkuptim se “Izraeli rezervon të drejtën e tij të plotë për vetëmbrojtje dhe do të veprojë nëse Hamasi përdor terrorizëm, dhunë ose riarmatim”.
Ndërkohë, një burim izraelit bëri me dije për CNN se Netanyahu tha se përparimi në planin e fundit prej 15 pikash të presidentit Trump për Gazën, do të ishte “problematik” për shkak të zgjedhjeve të ardhshme izraelite.
Zyra e kryeministrit izraelit tha se diskutimet u përqendruan në krijimin e dy grupeve të punës: një për çarmatosjen e Hamasit dhe një tjetër për ndërtimin e kanalizimeve për ujin e pastër në Gaza.
Nikolay Mladenov, i dërguari i Bordit të Paqes i Trump për Gazën dhe ish-kryeministri britanik Tony Blair ishin gjithashtu të pranishëm.
Kushner dhe Mladenov ishin takuar më herët në Kajro me udhëheqësin e Hamasit, Khalil Al-Hayya, në një përpjekje për të çuar përpara planin e presidentit Trump për Gazën.
