Eduart Halimi, deputet i PD dhe anëtarë i komisionit parlamentar të ligjeve, ka kritikuar sot kryetarin e këtij komisioni Ulsi Manja, për atë që ai e ka vlerësuar si presion ndaj prokurorisë, faktin që Manja sulmoi institucionin e prokurorisë që çoi në gjykatë kërkesën për mbylljen e aferës miliona euro të privatizimit të CEZ.
Halimi e cilësoi si sulm politik ndaj prokurorisë deklaratat e Manjës, që kundërshtonte vendimin e Prokurorisë për të groposur aferën miliona eurosh të privatizimit të CEZ. Rreshtimi i deputetëve në krah të institucioneve që luftojnë krimin dhe korrupsionin është një sinjal pozitiv. Një gjë e tillë duhet bërë duke mos i ndarë institucionet të tipit p.sh: Llalla është i yni se e ka emëruar Berisha dhe Meta, ndërsa Policia është e atyre se Xhafajn e ka emëruar Rama.
Por kur është fjala mbi të ashtëquajturën mbështetje për prokurorinë, Halimi është i fundit në rradhë që duhet ta bëjë këtë. Ai ka qenë kryetar i komisionit parlamerntar për hetimin e 21 janarit, ish- ministër drejtësie, deputet, dhe asnjëherë nuk u distancua nga ish- kryetari i tij Berisha kur gjëmonte kundër kryeprokurorit Theodhori Sollaku duke akuzuar se ‘fle mbi dosje krimi’ dhe shkeli çdo ligj e Kushtetutë deri kur e shkarkoi.
Kur shante mbarë e prapë me fjalor rruge kryeprokuroren si ‘lavire’, kur akuzonte prokurorët se ishin pjesë e puçit, kur nuk la gjë pa bërë kundër prokurorëve që hetonin zhdukjen e një fshati të tërë nga faqja e dheut dhe vrasjen e 26 njerëzve në Gërdec, thjeshtë për biznesin kriminal ku ishte përfshirë qeveria në trafikun e armëve etj. Pse nuk the një fjalë të vetme në emër të “ruajtjes së pavarësisë së institucioneve’, ‘të mbështetjes ndaj drejtësisë’ etj.etj., slogane të artikulara edhe sot në komisionin parlamentar të sigurisë?! Halimi edhe “mund të harrojë”.
Por, natyrisht ne jo. Nëse ke heshtur atëhere kur duhej të flisje, tashmë fjalët e sotme s’kanë më asnjë vlerë. Aq më shumë kur përpiqesh të na i shesësh si standard.
Armando Meta
