Izraeli ndërmori një sulm të paprecedentë të martën pasdite, më 9 shtator, duke goditur drejtuesit e Hamasit në Doha, Katar.
“Së bashku prej vitesh, thuhet në një deklaratë të qeverisë izraelite, këta drejtues të Hamasit kanë udhëhequr operacionet e organizatës terroriste, kanë qenë drejtpërdrejt përgjegjës për masakrën brutale të 7 tetorit 2023 dhe kanë orkestruar luftën kundër shtetit të Izraelit”, njoftoi ushtria izraelite.
Sipas Channel 12, operacioni mban emrin “Atzeret HaDin” (Dita e gjykimit), ndërsa Times of Israel raporton se ushtria e quan atë “Summit of Fire”.
Katar deri më tani kishte luajtur rolin e ndërmjetësit mes Hamasit dhe Izraelit që nga nisja e luftës pas 7 tetorit 2023, kur sulmet e Hamasit shkaktuan 1 mijë e 200 viktima në Izrael. Një zyrtar i Hamasit në Gaza i tha AFP-së se në shënjestër ka qenë pikërisht ekipi negociator i lëvizjes, i mbledhur në Doha për të diskutuar propozimin më të fundit të presidentit amerikan Donald Trump për një armëpushim, një propozim që Izraeli sapo kishte njoftuar se e kishte pranuar.
Megjithëse disa burime thanë se Trump kishte “miratuar” sulmin, kryeministri Benjamin Netanyahu deklaroi se bëhej fjalë për “një operacion tërësisht të pavarur të Izraelit. Izraeli e nisi, Izraeli e kreu dhe Izraeli merr përgjegjësinë e plotë”.
Sipas televizionit Al Arabiya, në shënjestër të sulmit ishin:
Khaled Meshaal
Khalil al-Hayya
Zaher Jabarin
Mohammad Ismail Darwish
Mousa Abu Marzouk
Hussam Badran
Tahar Anunu
Nuk është ende e qartë nëse ka pasur viktima, por dy burime të Hamasit thanë për Reuters se “delegacioni në Doha për negociata i ka mbijetuar sulmit”.
Bëhet fjalë për figurat më të larta të lëvizjes: Khalil al-Hayya është kryenegociatori dhe ish-zëvendës i Yahya Sinwar; Meshaal drejton sektorin e diasporës; Darwish është shefi i zyrës politike; ndërsa Jabarin njihet si “njeriu i financave” të Hamasit.
Meshaal, i cili i shpëtoi dikur një tentative helmimi nga Mossad, dhe al-Hayya, që ka marrë pjesë në negociatat në Katar, janë prej kohësh të lidhur me rrjetin ndërkombëtar të Hamasit. Pavarësisht se jeton në mërgim, al-Hayya e ka rritur ndjeshëm peshën e tij politike brenda lëvizjes.
